Ukiuni aqqaneq-marlunni siullermeerluni: Nunatsinni tamarmi imeq mingoqanngitsoq
Nukissiorfiit imermik mingoqanngitsumik pilersuisinnaanertik tulluusimaarutigisinnaavaat. Kalaallit Nunaanni sumiiffinni tamani ukiuni aqqaneq-marlunni siullermeerluni imeq qalateqqaarneqartariaqanngilaq.
Kalaallit Nunaanni imeq minguinnersaavoq. Nunarput taama ilisimaneqarluarpoq.
Taamallu ilisimaneqarneq maanna eqqorluinnarpoq, nunatsinnimi imermik qalatitseqqaartoqartariaaruppoq – ukiuni aqqaneq-marlunni siullermeerluni.
- Pisoq angusarput oqaluttuarisaanermut ilannguppoq, tassa Kalaallit Nunaanni qalatitseqqaarnissaq atorunnaarmat. Tamanna nunat allat amerlanngitsut angusinnaavaat, soorlu Danmarkimi akuttunngitsut assersuutigisartagarput, soorlu assersuutigalugu qalatitseqqaaqqusisarput. Assut tulluusimaarutigaarput erngup imerneqartussap pitsaassusiat, Nukissiorfinni pisortaanerugallartoq Claus Aagaard-Andersen oqaluttuarpoq.
Nukissiorfiit tusagassiutinut nalunaarutiminni ilisimatitsissutigaat erngup minguissusaanik misiliinerup kingulliup kingorna, Tasiilap nunaqarfiani Isortumi najugaqartut imermik qalatitseqqaartariaaruttut.
Taamaasilluni nunami tamarmi imermik imertoqassatillugu qalatitseqqaartoqartariaaruppoq.
Imeq minguilluinnartoq tamanut
Kalaallit Nunaanni imermik pilersuinerup misissorneqartarnissaa 2017-imi atuutilermalli sumiiffinni ikinnerpaamik ataaseq tamatigut qalatitseqqaarfiusariaqartarsimavoq. 2016-imi illoqarfiit nunaqarfiillu katillugit 20-ngajaat piffissami aalajangersimasumi ataatsimi qalatitseqqaaqqusinermik innersuussutigineqarsimapput.
Isortumi maanna qalatitseqqaaqqusineq atorunnaarsinneqarmat, nunarsuarmi imermik minguinnerpaamik pilersuinertik Nukissiorfiup tulluusimaarutigisinnaanngorpaa.
- Ukiuni kingullerni qalatitseqqaarnissamik inassuteqaatit malunnaateqarluartumik ikileriarsimapput. Tamatumunnga siullertut pissutaaneruvoq sulisutta pikkorissut aallussilluarnerat. Taamaattorli neriorsuutigisinnaanngilarput qalatitseqqaarnissamik inassuteqaammik pisoqaqqinnginnissaa, kisianni titarneq ajunngitsumik ingerlavoq aamma angusaq pitsaalluinnartoq ullumikkut anguarput, Claus Aagaard- Andersen oqarpoq.