Ukiuni 30-nngortorsiortoq: Qamanngarujuk illarpalaaq pitsaanerpaavoq
Quiasaartartoq Piitannguaq Alaufesen isiginnaartitsisarluni ukiuni 30-nngortorsiorpoq. Quiasaartartoq assigiinngitsorpassuarnik kinaassuseqalersinnaasoq, Katuap arfininngorpat 23-nngortorsiorluni nalliuttorsiorneranut atatillugu, isiginnaartitsissaaq.
Quiasaartartup Piitannguaq Alaufesenip ukiuni 30-ni aliikkusersuisareersimanini ukioq manna nalliuttorsiutigissavaa.
Arfininngorpat februaarip 15-ani quiasaaraluni isiginnaartitsissaaq, isiginnaariartortullu kinaassutsit sisamat ullormi tassani naapikkumaarpaat.
- Aliikkusersuinermi inuttat sisamat naapinneqarsinnaajumaartut oqarsinnaavunga. Arlallit Uulliarsuaq Aapasoq eqqaamassajunnarsivaat, taanna aliannaarutigineqarsinnaavoq, Uulliarsuaq qilaatersortartoq pillugu oqaluttuarpoq.
Uulliarsuaq isiginnaartunit aliannaarutigineqarsinnaavoq, aammali aliortuaajaasartoq pillugu quiasaarisoqassaaq, taakkulu saniatigut Piitannguaq Alaufesen præsident Donald Trumpimik kakatsilluni isiginnaartitsivissamut isertoq takuneqarsinnaajumaarluni.
- Præsident Donald Trumpip Kalaallit Nunaat pisiariumammagu tamatta eqqaamasimassajunnarsivarput. Taamaattumik soorunami isiginnaartitsinermi ilaatinneqassooq. Takutitsinissalli imaa pillugu allamik oqarsinnaanngilanga, Piitannguaq Alaufesen oqarpoq.
Katuaq arfininngorpat aamma nalliuttorsiussaaq.
Piitannguaq Alaufesen nassuiaavoq quiasaarinissaq pillugu Katuaq isumaqatigiissuteqartuusimasoq.
- Katuami upperaarput kulturip inunnut nukittorsaasoq inuillu kulturimut nukittorsaasut. Tamanna sulinitsinnut ataqatigiinitsinnullu tunngavittut isigaarput, Katuami pisortaq Arnakkuluk Jo Kleist tusagassiutinut nalunaarummi oqaaseqarpoq.
Piareersaqqaarani isiginnaartitsisartoq
Piitannguaq Alaufesen inuusunnermini quiasaarinerup saniatigut isiginnaartitsinermik aamma soqutigisaqarsimavoq.
- Isiginnaartitsinermik soqutigisaqartuunikuugaluarpunga. Quiasaarinerli aallunneruleriartuinnarsimavara. Inuit illarpalaaraangata nuannaartarpunga, oqaluttuarpoq.
Quiasaarisaleqqaaramili sungiusaqqaarnani isiginnaartitsinissaq nuannarineruaa. Taama isiornikkut Uulliarsuaq Aapasoq, aliortuaajaasartoq, nersorneqartoq allarpassuillu pinngorsimapput.
Atisassani atigaangamigit inuttassaq nammineerluni inissikkiartortartoq, nassuiaavoq. Sungiusaqqaaranilu isiginnaartitsisinnaasami, kisimiilluni aamma isiginnaartitsisarneruvoq.
Illarneq akissarsiani annerpaavoq
- Inuttalersuisarpoq immikkuullarissunik nuannarillualernikuusatsinnik. Piitannguaq Alaufesen qularnanngilaq nunatsinni quiasaarisartuni nalunnginneqarnerpaat ilaanniittoq ukiunilu 30-ni nuannarineqarluarluni illarsaarisarsimasoq, isiginnaartitsinissaq pillugu Katuaq allagaqarpoq.
Quiasaartartoq pillugu Katuap nersuinera imaaginnavippoq. Quiasaartartorli ilisarisimaneqarluartoq, nunatsinnilu angalangaatsiartarsimasoq, maniguunneruvoq.
- Akissarsiani annerpaaq pisinnaasara tassaavoq illarneq. Isiginnaartut illaleraangata tassa nersornaatini annerpaaq tassuuna pisarpara, oqarpoq.
Juullip Nipitittagaata Aningaasaateqarfiata kultoorikkut nersornaataanik siorna tunineqarpoq.
- Arfininngornermi isiginnaariartussat illarpalaarnissaat qilanaaraara. Inuup qamanngarujussuaq illarpalunnera nuannernerpaasarpoq. Isiginnaartitsillunga angalanissara aamma neriuutigaara, Piitannguaq naggasiivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...