Kalaallit Nunaat EU-lu
Ukiuni 30-nngortorsiornermi Birger Poppel: EU-p avataaninneq iluaqutitaqarneruvoq
Sapaammi februaarip aallaqqaataani 2015 ukiut 30-t qaangiupput Kalaallit Nunaat europamiut suleqatigiiffiannit animmat inissisimalerlunilu ´nunat territoriallu nunasiaasimasut´ akornanniittutut. Taamatut nikinneq ajoquteqarneranit iluaqutissartaqarnerusimaqaaq, inuiaqatigiileritooq naliliivoq
Europami nunat suleqatigiit qimavinneqarput, Kalaallit Nunaat 1985-imi februaarip aallaqqaataani taamanikkut EF-imit animmat. ´Nunat territoriallu nunasiaasimasut´ (OLT) akornanniilernermigut Kalaallit Nunaat ullumikkut OLT-tut inissisimanermini ajoqutissaqarnerminit iluaqutissaqarneruvoq. Taamatut isumaqarpoq Ilisimatusarfimmi inuiaqatigiileritooq Birger Poppel.
– Kalaallit Nunaat ´EU´-mut ilaajunnaavissimasutut isikkoqarmat tamatumunnga pissutaavoq ajornakusoortut, tassa EU-p inatsisaasa kalaallit inatsisaannut oqaasiinullu nuunnissaat pinngitsoortaratsigu, aammalu aalisakkanik pisassavut nammineq aalajangertaratsigik, Birger Poppel oqarpoq nangillunilu:
– Tamanna peqatigalugu aamma pingaarutilinnik iluaqutissartaqarpoq. Ilaatigut maanna Kalaallit Nunaata inissisimanerani Peqatigiinnermik isumaqatigiissut pingaarutilerujussuuvoq. 300 millioner koruunit Namminersorlutik Oqartussat ukiumut pisartagaat, qularjanngitsumit ilaasortaanikkkut pisartagassaagaluanit amerlanerupput, inuiaqatigiileritooq oqarpoq.
EU-mut ilaasortaanikkut
iluaqutissat takujuminaapput
Kalaallit Nunaata EF-imit, kingorna EU-ngortumit, anineranit ukiut 30-inngortorsiorneanni Birger Poppelip EU-mut tamakiisumik ilaasortaanissamut tunngavissat pitsaasut takujuminaatsippai.
– Suliassani aalajangersimasuni tamatigut tunngavilersuutigineqarsinnaavoq aalajangiinernut qanittuunikkut iluaqutissaqarnera. Assersuutigalugu ´EU-p puisit amiinik eqqusseqqusiunnaarnerani´. Pisunili taamaattuni Kalaallit Nunaata aalajangiinerit sunniiniarnikkut sunnerniarsinnaavai, taavalu nuannaarutigissavarput aningaasat, ukioq kaajallallugu Bruxelles-imi aalajangersimasumik sulisoqarnissatsinni, sipaaratsigit, Birger Poppel oqarpoq.
Namminersulivinnissamut EU aporfiuvoq
Kalaallit Nunaata ukiuni 30-ni nunatut OLT-tut inissisimanera tamakkiisumik ilaasortaanermik taarserneqarnissaa ilimanartoqarpianngilaq. Allaammi EU-mi ilaasortaanikkut Kalaallit Nunaata siunissami namminersulivissinnaanera killilerneqassaaq. Tamanna pissutigiinnarlugu Kalaallit Nunaata EU-mut atatillugu inissisimanera allanngornavianngilaq.
– Namminerssulivinnissamik suli anguniagaqartoqarpat peqatigiiffimmut, namminersornermik pissarsarineqareersimasumik killiliisumut, ilaasortaanissaq isumassaqanngilaq, Ilisimatusarfimmi inuiaqatigiileritooq Birger Poppel oqarpoq.