naatsorsuutit

Ukiumut naatsorsuutit inerneri: Royal Greenland aatsaat taama angusarissaartigaaq

Nunatsinni suliffeqarfiit annersaat akileraannginnermi 199 millioner koruuninik sinneqartoorpoq 2013-mit 2014-mut

Royal Greenlandip pisortaanera Mikael Thinghuus

Royal Greenland ukiuni 2013-mit 2014-mut naatsorsuutaata inernerini 199 millioner koruuninik sinneqartoorpoq.

Angusarineqartoq siulersuisunit naammagisimaarneqarpoq.

- Tunisassiorfiup Wilhelmshavenimiittup tunineqarnera pissutigalugu kaaviiaartitat ikinnerugaluartut Royal Greenland akileraannginnermi 199 millioner koruuninik angusaqarpoq. Suliffeqarfissuup oqaluttuarisaanerani aatsaat taama pitsaatigisumik akileraannginnermi angusaqartoqarpoq. Royal Greenlandip Amerikamiut umiarsuaatileqatigiiffianni Iquiquemi ikinnerussuteqartumik piginneqataassutsini tunisimagaluarai ukiumoortumik nalunaarusiami ingerlatsinikkut angusat pitsaapput, Royal Greenlandip pisortaanera Michael Thinghuus allappoq.

Pingaarnertut aallussatigut angusat 2013/14-imut ukiumoortumik nalunaarusiaq ilanngullugu ukiuni sisamani tulleriinni annertusiartorput sinneqartoorutaaffiulluarlutillu.

Pilersuisutut nunarsuarmi siuttunngornissaminut anguniagaqartoq
- Taama angusaqarnikkut Royal Greenlandip aalisakkanik Atlantikup Avannaata imartaaneersunik pilersuisutut nunarsuarmi siuttunngornissaminut anguniakkani aningaasaqarnikkut kiffaanngissuseqarfigilerlugulu nukissaqarfigilerpaa, tassa iliuusissatut pilersaarutitsinni The North Atlantic Championimi pilersaarutivut malilluinnarlugit, Mikael Thinghuus oqarpoq.

Saarullinnik tunisassiorneq Royal Greenlandimut suli annaasaqaataajuarsinnarpoq angusatigut 30 millioner koruuninit amerlanerusunit annaasaqaataalluni, angusalli ukiup matuma siuliani angusanut sanilliullugit pitsaanerupput. Saarulliit akii appasittuarsinnarput, siunissamili pitsanngoriartuaarumaarlutik.

Akiitsorineqartut annikillineqarput
Nammineq aningaasaatit 1.166 millioner koruuninut amerleriarput, ingerlatseqatigiiffiullu akiliisinnaassusaa ukioq manna 33,2 procentiuvoq siorna 28,4 procentiusoq. Nammineq aningaasaatit akiitsunit ernialinninngarnit maanna amerlanerupput.

Namminersorlutik Oqartussanut isumaqatigiissut naapertorlugu ukiumut angusanit agguagarsiassat 34 millioner koruunit immikkoortinneqarput, taakkualu ukiumut angusat 25 proceteraat.

- Akiitsugut erniallit 1,5 milliarder koruuningajannik ikilipput, akileraannginnermi angusat siornatigut ajalusoornerpaaffimmi 200 millioner koruuninik amigartooruteqarfiusartut ukiuni pingasuni kingullerni 150-200 millioner koruunit missaanniittarput, taamatuttaaq tuniniaanermi pitsaanngitsumik inissisimanerput pingaarnertut aallussatigut patajaatsumik inissisimalernitsinnut sangutipparput. Ineriartorneq tamanna milliarderpaalunnik naleqarpoq. Tamatumanilu Kalaallit Nunaanni aalisartunut annertunerujussuarmik akiliuteqartoqarnera sulisoqarnikkullu inuiaqatigiit aningaasaqarniarnerannut iluaqutaasumik Royal Greenlandimi 200-ngajannik suliffinnik pilersitsisoqarsimanera pineqarput, Michael Thinghuus angusarineqartut inerneri pillugit oqaaseqaammini allappoq.

Ukiuni pingasuni kingullerni ukiumoortumik naatsorsuutit naapertorlugit Kalaallit Nunaanni sulisut 186-inik tassa 23 procentinik amerlipput. Amerleriaatsit sineriammi ingerlatseqatigiiffiullu qullersaqarfiani Nuummiittumi pipput.

Powered by Labrador CMS