Ukiumoortumik nalunaarusiaq: Utoqqaat illersuisuata attaveqaatini annertusarai
Utoqqarnut illersuisunngorlaap novembarip aallaqqaataani ivertinneqartup, 2021-mi qaammatit siulliit marluk atorlugit utoqqarnik sullissinermi attaveqaatini annertusarsimavai. Aallattoqarfik innuttaasumit ataatsimit saaffiginnissummik tigusaqarsimavoq.
Inga Egedep, 2021-mi novembarip allaqqaataani utoqqaat illersuisuattut atuutsinneqalersup 2021-mi novembarip decembarillu qaammatai allattoqarfimmik pilersitsinissamutt peqatigiiffiillu aamma utoqqaat akornanni attaveqaatimi annertusarneqarnissaannut atorsimavai.
Utoqqaat Illersuisuat puiguttorneq pillugu Ilulissani 2021-mi novembarip ulluisa 23-anni 24-annilu ataatsimeersuarnermi peqataavoq, puigortunngorsimasunillu sullissinermut tunngasunik suliallit utoqqaat illuanneersut taavalu Isumaginninnermut Naalakkersuisoqarfimmi Peqqinnissamullu naalakkersuisoqarfimmi atorfillit aamma ataatsimeersuaqataallutik.
- Utoqqaat Illersuisuata puigortunngorsimasunik sullissinermut tunngasunik suliallit kommunerisaminni najukkaminnilu suliatigut akisussaaffimminni ajornartorsiutaat paasisaqarfiginerummagit puiguttorneq pillugu ataatsimeersuaqataanini pissarsiaqarfigilluarpaa.
- Utoqqaat Illersuisuata puigortunngorsimasut, taakkununnga qanigisaasut sulisullu puigortunngorsimasunik sullissinermut tunngasunik suliallit illoqarfinnilu nunaqarfinnilu utoqqaat illuini ataasiakkaani atugaat kipiluttunartut ataatsimeersuarnermi peqataareernermini misissoqqissaarpai, utoqqaat illersuisuat 2021-mut ukiumoortumik nalunaarusiamini allappoq.
Misissuinerit 2022-mi ingerlatiinnarneqassapput.
Innuttaasumit ataatsimit saaffigineqarsimasoq
Utoqqaat Illersuisuata allattoqarfia 2021-mi novembarip decembarillu qaammataanni innuttaasumut ataatsimut tunngatillugu tallimariarluni saaffigineqarsimavoq. Angutip utoqqaap 66-inik ukiullip Upernavimmeersup pania, suliamut aalajangersimasumut tunngatillugu tallimariarluni utoqqaat illersuisuannut saaffiginnissimavoq.
Angut taanna siusinaartumik pensionisiaqalernissamut qinnuteqaatini pillugu kommunimut 2021-mi aggustip qaammataanili qasseerpassuariarluni saaffiginnilluni akissutisiniartarsimavoq. Kommunimi sullissisut ilaata angut taanna allakkatigut akinagu oqaasiinnakkut arlaleriarluni itigartittarsimavaa. Utoqqaat illersuisuat ilisimatitsissutigaa, angut pineqartoq 67-inik ukioqalereersoq 2022-mi martsip allaqqaataaniit utoqqalinersiuteqartinneqalersimasoq.
- Innuttaasut saaffiginnissutaannut tunngatillugu piffissami sivisuumi qasseeriarluni siun-
nersuisoqarsinnaasarneranik tamanna ersersitsivoq, utoqqaat illersuisuanit oqaatigineqarpoq.
Peqatigiiffiit naapinneqarsimasut
Inga Egedep utoqqaat illersuisorisimasaat Helene Egede 2021-mi upernaakkut atorfimminit tunuartoq taarserpaa.
Inga Egedep puiguttorneq pillugu Ilulissani ataatsimeersuartoqarnerani utoqqaat peqatigiiffii marluk naapissimavai. Utoqqaat illersuisuata aamma puiguttorneq pillugu Ilulissani ataatsimeersuartoqarnera iluatsillugu utoqqaat peqatigiiffii marluk ataatsimeeqatigisimavai. Taamatuttaaq utoqqaat illersuisuat Kattuffik Utoqqaat Nipaata 2021-mi decembarip allartinnerani ataatsimeersuarnerannut alaatsinaattutut peqataasimavoq.
Kattuffik Utoqqaat Nipaat ataatsimeersuarmat, utoqqaat illersuisuat Kalaallit Nunaanni utoqqaat atugaat pillugit misissuisoqarnissaanik arlaleriarluni kaammattorneqartarsimavoq. Kattuffimmit ilaatigut kissaatigineqarsimavoq, Nunatsinni inuit puigortunngorsimasut inuu-
nermi atugaat qanoq innersut paaserusunneqarsimavoq, aamma kommunini ataasiakkaani utoqqarnik sullissisut najukkaminni utoqqaat peqatigiiffiinut peqataanerusariaqartut kaammattuutigineqarsimavoq.