Narsaq
Ukiumoortumi pisartumi nersutinik toqoraaneq naammassilluarpoq
Savaaqqat savallu tunisarineqartut amerlassusaat ukiuni kingullerni pingasuni aatsaat taama qaffasitsigaaq
Narsami ukioq manna Neqi A/S-imut tunisassiorneq, qaammatip aappaa avillugu ingerlanerani tunisassiortoqareersorlu, oktobarip naanerani matuneqarpoq.
Ukiut pingasut ingerlanerini ukioq manna savaaqqanik savanillu tunisassiorneq qaffasinnerpaaffissaminiippoq, soorluttaaq aamma 2017-imi kiilumikkut ukiunut siullernut marlunnut sanilliullugit annertunerusut, Neqi A/S allappoq.
- Savaaqqat toqorarneqartut amerlinerata kinguneraa Nunatsinni savanik savaaqqanillu pitsaalluinnartunik kujataaneersunik piumaneqarluartunik pilersuisinnaanerulerneq – soorluttaaq aamma suliffiit pingaarutillit taamaalilluni paariinnarneqarsinnaasut, Neqi tusagassiuutinut nalunaarummi allappoq.
Naatsiiat akuutissaqanngitsut amerlanerusut
Naatsiiaateqarnerlu aamma ingerlalluarfiusoq, paasissutissiarineqarpoq.
- Naatsiiat tunisassiarineqartut ukioq 2016-imiit sanilliullugit naatitsisartunit amerlanerusuniit pissarsiarineqarput, pilersaarutaavorlu ukiup tulliini naatsiianik tunisassiisarneq qaffakkiartortinneqassasoq, Neqi nalunaaruteqarpoq.
2017-imi ukiakkut Neqi A/S-ip naatsiianik naatitsisartut kinguneqarluartunik ataatsimeeqatigisaqattaarpai, taamaattumik naatsiaanik Nunatsinneersunik 2018-imi naatitsisarneq pilersaarusiorluarneqarnerulerlunilu nassiussueriaaseq pitsanngorsarneqassaaq.
Ukioq mannalu umimmannik tuttunilluunniit tunisisoqarsimanngilaq.
- Umimmannik tuttunillu tunisisarneq eqqarsaatigalugu 2018-imi ingerlanneqaqqinnissaa pilersaarutigineqarpoq, Neqi allappoq.