Ukiumi siullermi ilinniagaqartunut inissialiortoqarnissaa Aaja Chemnitzip kissaatigaa
Septemberimi kalaallit ilinniagaqartut nutaat 83-it ilinniarnertik Københavnimi aallartippaat. Ilinniartunut inissialiornikkut ilinniartuunermut pitsaanerusumik atugassaqartitsissasoq, folketingimi ilaasortaq isumaqarpoq.
Inuit Ataqatigiinnit Folketingimut ilaasortaatitaq Aaja Chemnitz ukiunut tullernut aningaasanut inatsisissap isumaqatigiissutiginiarneqarnerani siunnersuuteqarpoq.
Københavnimi ukioq siulleq ilinniagaqartunut nutaamik ilinniartunut inissialiortoqarnissaanut aningaasanik immikkoorsisoqassasoq siunnersuutigaa. Kalaallit ilinniagaqartut Københavnimi aallartikkaangata ilinniartut inissiaannik amigaateqartarput, tamannalu ilinniarluni aallartinnermi oqimaassinnaasarpoq.
- Ukioq siulleq ilinniagaqartunut Københavnimi inissialiornissaq pisariaqartipparput. Ilinniartuutigut amerlavallaat suli inissarsisimanatik Københavnimut annguttarput. Tamannalu nunami takornartamut nuulluni ilinniarluni aallartinniarneq pisarioreeqisoq qallerlugu pisarissersuutaalersarpoq, Aaja Chemnitz tusagassiutinut nalunaarummi oqarpoq.
Taamatut aaqqissuussineq illoqarfinni ilinniarfiusuni allani atugaareerpoq, tassalu Aarhusimi Odense-milu qanittukkullu aamma Aalborgimi taamatut aaqqissuussisoqassamaarluni. Københavnimi assingusumik iliuuseqartoqartariaqartoq isumaqarpoq, Københavnimimi kalaalerpassuit ilinniagaqarput.
83-it ilinniagaqarlutik aallartipput
Ukioq manna septemberimi kalaallit ilinniagaqartut nutaat 83-it ilinniarnertik Københavnimi aallartippaat, arlallillu ilinniarnermik aallartinnerani suli inissarsisimanngillat, Aaja Chemnitz ilisimatitsivoq.
- Taamaaliornikkut ikerinnakkut ilinniakkamik unitsitsisarneq annikillisarneqarsinnaavoq kalaallillu ilinniagaqartut allat peqatigalugit aallaaveqarfissamik toqqissisimanartumik pilersitsisoqarluni. Inuit pikkorissut, ilinniarnerminni aallartitsilluartut naammassigunillu Nunatsinnut uterusuttut pisariaqartippagut, Aaja Chemnitz oqarpoq.
Kalaallit Nunaat akisussaaffik paarivaa
Ilinniartitaanermut tunngasut Kalaallit Nunaata akisussaaffigaa. Kalaallit Danmarkimi ilinniagaqartut peqatigiiffiat, Avalak, ilinniartunut inissialiortoqarnissaa ukiorpassuarni oqariartuutigisareerpaa.
Taamaattumik danskit aningaasanut inatsisaannit aningaasanik ujartuisoqarnissaa Aaja Chemnitz isumaqarpoq.
- Københavnimi ukioq siulleq ilinniagaqartut inissaqartinnissaannut aningaasanik immikkoorsisoqarnissaa IA-miit tapersersorparput. Inuit Ataqatigiit sulissutigiumavaat aningaasat danskit aningaasanut inatsisaannut immikkut ittumik pingaartillugit inissinneqarnissaat, tamatumanilu Siumut – aammattaaq ilinniartuutitta inissaqartinneqartannginnerannik ernummateqarlutik oqariartuuteqarnikoq – suleqatigiumallugu, oqarpoq