Ukiukkut umimmanniartoqartannginnissaanik siunnersuut itigartitsissutigineqartoq
Qeqqani aasaanerani aallaarsimaartarfiusuni, ukiukkut umimmanniartoqartannginnissaanik siunnersuut kommunalbestyrelsemi amerlanerussuteqartut itigartitsissutigaat. Sumiiffinnili umimmaat qassiunersut kisinneqarnissaat kommunalbestyrelsep piareersimaffigineruaa.
Kommunalbestyrelsemi ilaasortaq Gideon Lyberth (S), siunnersuuteqarpoq Angujartorfimmi, Tatsip Ataani aamma Umiivinni ukiukkut umimmanniartarnerup ukuni tallimani uninngatinneqarnissaa pillugu kommuni Namminersorlutik Oqartussanut qinnuteqassasut. Siunnersuulli Qeqqata Kommuniani amerlanerussuteqartunit itigartitsissutigineqarpoq.
Kommunalbestyrelsep 24. november ataatsimiinneranit imaqarniliami tamanna atuarneqarsinnaavoq.
Sumiiffiit taaneqartut aasakkut aasarsioriarfiusarput. Gideon Lyberth siunnersuummini innersuussutigaa Namminersornerullutik Oqartussat umimmaat illersugaanerat piniagaanerallu pillugit nalunaarutaat. Taanna naapertorlugu kommunalbestyrelse malittarisassaniit sukannernerusunik inassuteqarsinnaanera, sumiiffinni umimmaat amerlassusaat illersorumallugit.
Peqatigiiffiit naaggaartut
Siunnersuut kommunimi piniartut peqatigiiffiini tusarniutigineqarsimavoq.
- Allaffeqarfiup nalilerpaat tusarniaaffigineqartut amerlanerit siunnersuut akuerinagu nalunaaruteqartut. Uggornartoq tusarniaaffigineqartut ilai akissuteqanngimmata. Taamaattoq allaffeqarfiup nalilerpaa akissuteqaatit tiguneqartut piffinni assigiinngitsuni pineqartoq pillugu isummanik tikuussilluartoq, allaffeqarfik allappoq.
Piniartut peqatigiiffii tallimat tusarniummut akissuteqarsimapput. Akissutaallu ersarilluinnarpoq: Ukiukkut umimmanniartarnerup unitsinnissaanut naaggaarpugut.
Umimmaat kisinneqarlik
Qeqqata Kommuniani allaffeqarfiup taarsiullugu siunnersuutigaa kommunalbestyrelse Namminersorlutik Oqartussanut qinnuteqassasoq umimmaat aqutsiveqarfik Maniitsumi aamma aqutsiveqarfik Sisimiuniittut kisinneqarnissaat pillugu.
Tamassumunnga tunngavilersuutigineqarpoq sumiiffinni umimmaat 2018-imi kingullermik kisinneqarsimanerat.
- Allaffeqarfiup nalilerpaa periarfissaasoq kisitsisoqanissaanik kissaaneqarluni Namminersorlutik Oqartussanut saaffiginnittoqarnissaa tamatumalu saniatigut siunnersuummi nunaminertat pineqartut ukiuunerani umimmanniarnermi pisassiinermi immikkut isiginiarneqartarnissaat periarfissaasoq saaffiginnissutigissallugu, allaffeqarfik siunnersuutimini allappoq.
Allaffeqarfiup naliliinera tunngavigalugu kommunalbestyrelse aalajangerpoq Qeqqata Kommuniani umimmaat kisinneqarnissaannut piumasaqarnissamut siunnersuut kommunalbestyrelsemi kingusinnerusukkut oqaluuserineqaqqissasoq.