Ukiukitsut kinguaassiuutitigut aamma nappaateqalersartut

Nunatta Nakorsaaneqarfianit Allakkiaq, ukioq manna maajip 24-ani saqqummersoq naapertorlugu, kinguaassiuutitigut nappaatit atoqatigiinnikkut tuniluuttartut suli annertuumik ajornartorsiutaapput, ilaatigullu unammilligassaqarluni annertusiartortunik, aviisi Sermitsiaq allappoq.

Tassani takutinneqarpoq, gonoré chlamydialu inuusuttuaqqani 15-it inorlugit ukiulinni aamma atugaasartut. Taamaalilluni chlamydiartut 46-uusimapput gonorértullu 13-iusimallutik, taakkualu tamarmik marluk kisiisa minillugit niviarsiaraallutik. Niviarsiaraq 12-nik ukiulik chlamydiarsimavoq, taamatuttaarlu niviarsiaqqaq 13-inik ukiullit qulingiluat chlamydiarsimallutik marlullu gonorérsimallutik.

Inuiaqatigiinni ajornartorsiut

Niviarsiaqqat 14-inik ukiullit 34-t chlamydiarsimapput, tamannalu Kalaallit Nunaanni niviarsiaqqat 14-inik ukiullit quliugaangata ataatsip 2018-imi chlamydiartarsimaneranik takutitsilluni.

Tamatumunnga sanilliullugu niviarsiaqqat 14-inik ukiullit akornanni niviarsiaqqat 33-ugaangata ataaseq gonorérsimasarpoq.

- Kinguaassiuutitigut nappaatit atoqatigiinnikkut tuniluuttartut, pingaartumik inuusuttuaqqat akornanni, inuiaqatigiinni annertuumik ajornartorsiutaapput nunarsuarmilu sumiiffinnit allanit tamangajannit ajornartorsiutaanerujussuullutik. Taamaattumik kinguaassiuutitigut nappaatit atoqatigiinnikkut tuniluuttartut tuniluuttarnerannik unitsitsiniaalluta tamatta ikioqatigiinnissarput kaammattuutigisariaqarpoq, usuup-puuanik atuisoqartalerneratigut, isumannaatsumik atoqatigiinnikkut pinaveersaartitsisoqarneratigut, tunillanneqarsimaneq pasitsaassimagaanni misissortittarnikkut, tunillatsissimaneq paasineqaraangat katsorsartittarnikkut, kiisalu atoqatigisimasat tunillassimanerat imaluunniit tunillaasimanerat pasitsaassimagaanni oqaluttuuttarnerisigut, nunatta nakorsaanera Henrik L. Hansen kaammattuivoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Sermitsiaq Uge 35 2019

Klik her for at læse