ukiortaaq
Ukiortaami oqaaseqaatit namminersulernissamut tunnganerupput
Partiit Sulisitsisullu ukiortaami oqaaseqaataat namminersulernissamut pilersaarutinut tunngassuteqarnerupput
Namminersulernissamik siunniutaqarnermut ukiortaami oqalugiaatit imaqarneri tupaallaatissaagunanngillat.
Ukiarmi naalakkersuisooqatigiit nutaanik taarsermata namminersulernissaq eqqartungaatsiarneqaqqilerpoq. Naalakkersuisooqatigiit isumaqatigiissutaanni oqaaseqatigiit siullerpaaq namminersulernissamut tunngassuteqarpoq, namminersornermullu aamma naalakkersuisunngortitsisoqarnikuulluni.
S: Kalaallit Nunaat qitiutillugu
Namminersulerneq innuttaasunut iluaqutaassasoq Siumut isumarpoq.
- Inuiaat Kalaallit namminiilivinnissarput ornipparput. Namminiilivinnissap pisariaqartumik innuttaasunit akuerineqarsinnaasumik ilusilersorneqarnissaa Siumup Inatsisartunilu partiit allat peqatigalugit annertuumik akisussaaffigaat. Upperaarput namminiilivinnisaq kalaallit nunatsinnut iluaqutaalluni nuannaarutaajumaartoq. Tamatumani aamma pineqarpoq Danmarkimik suleqateqarneq, nutaamik pissanganartumillu siunissami ilusilerneqartussaq, Siumup siulittaasua Kim Kielsen ukiortaami oqaaseqaammini allappoq.
IA: Kikkut tamarmik peqataassapput
Inuit Ataqatigiit tunuliaqutaq apeqqutaatinnagu kikkut tamarmik inissaqartariaqartut isumaqarpoq.
- Namminersulivinnissamut piareersarnerput ataatsimoorluta suliarissavarput. Inuiattut nunatullu ataasiussuseq imaaliinaq angusassaanngimmat angujumallugit ataatsimoortariaqarpugut. Taamaaliussagutta allaanerussuteqaraluaruttaluunniit tamatta inissaqartariaqarpugut ataqqeqatigiillutalu. Nunatut tamakkiisumik namminersortunngussagutta ataatsimoornissarput suliassatta pingaarnersaraat, naalakkersuisutullu suliassarput akisussaaffippullu pingaarneq aamma tassaniippoq. Nunatsinni inuit ikittuinnaanerput isiginiagassaraarput. Nukiit tamarluinnaasa atorfissaqartippavut. Inoqatitsinnik ajattuissanngilagut aamma inoqatitta allaanerussuteqarnerat piinnarlugu inuluugisassanngilavut, Inuit Ataqatigiit siulittaasuat Sara Olsvig allappoq.
D: Piviusorsiornerunanilu assuarnarpoq
Namminersulernissaq pillugu oqariartuutit piviusorsiunngitsut Demokraatit isumaqarput.
- Demokraatini naalakkersuisoqatigiit naalagaaffinngornissamut »ilungersungaarnerat« ajoriffissaqartinngilarput, akueriuminaatsipparpulli naalagaaffinngornissaq oqarluartaarutitut imaqanngitsutut atormassuk innuttaasut inuiaqatigiillu oqaluttuunnagit suut kinguneriumaarnerai. Akisussaassuseqanngitsuliorneruvoq. Naalagaaffinngornissamut anguniagaqartut annertoorsuarnik takorluuipput, tamannali imminermini ajunngikkaluarpoq, kisianni sunnguamilluunniit pilersaarummik saqqummiussinikuunngillat aamma apeqqutit pingaaruteqarluinnartut soorlu aningaasaqarnermut tunngasut, inuit pisinnaatitaaffiinut tunngasut kiisalu tungiuinermi ikiorsiissutinut tunngasut sunnguamilluunniit isummersorfigiumanngilaat. Piviusorsiornerunngilaq aamma sakkortuumik assuarisariaqarpoq, Demokraatit siulittaasuat Randi Vestergaard Evaldsen allappoq.
GE: Aningaasaqarnermut politikki aarlerinarpoq
Naalakkersuisooqatigiit Namminersulernissap illuatungerluinnaanik sulissutigigaat Sulisitsisut (GE) isumaqarput.
- Namminersulivissagutta pisaraiqartipparput aningaasaqarnikkut imminut napatissinnaaneissarput. Nuna ima aningaasarsiortigisoq immineq aaliangikkani tunngavigalugit nunamik aqutsisinnaalluni. Aningaasarneq Qallunaat Nunaanni bloktilskudimik allatulluunniit aningaasaqaqrnikkut ikiorserneqarnissamik pisariaqartitsviunngitsoq. Taasat aallaavigalugit Siumup, Inuit Ataqatigiit Partii Naraq-lu isumaqatuiissuteqarnerat ernumanartortaqarpoq siunnerfilersugaanngippallaarlunilu tulleriaarinissalersugaanngippal-laarami. Naalakkersuisooqatigiimmi isumaqatigiissutaanni akileraarutit apparnissaat neriorsuutigineqarpoq, saniatigulli aamma anguniarneqarlutik atugarissaarnerulernissaq akisooq aammalu pisortat aningaasartuutaat isertitaallu imminnut oqimaaqatigiissagaasut. Kisianni 2017-imut amigartoorutitalimmik aningaasanut inatsisissamik akuersinerup takujminaatsippaa, qanoq iliorlutik Naalakkkersuisut taaneqartut iluatsitumik angusinnaassagaat, siulittaasoq Henrik Leth pisortarlu Brian Buus Pedersen Sulisitsisunit allapput.
Oqaaseqaatit tamakkerlugit atuarusukkukkit Sermitsiami atuarsinnaavatit: