Ukiortaami nalorsitsaarineq - 2014 eqqaamaviuk?

Apeqqutit akissutaat allaaserineqartut ataanni imaluunniit nalorsitsaarutit aterpiaanni takukkit.

Sermitsiaq.AG-p kikkut tamaasa ukiortaami pilluaqquvai!

Januaari:
Naalakkersuisunut siulittaasuusimasup Aleqa Hammondip aappaa Tom Ostermann tusagassiuutitigut malinnaaffigineqarpoq. Suna tamanna peqqutaava?

1. Aalisarnermut, Piniarnermut Nunalerinermullu Naalakkersuisoqarfimmi pisortaanertut atorfinitsinneqarpoq
2. Aalisarnermut, Piniarnermut Nunalerinermullu Naalakkersuisuusimalersumut Karl Lyberthimut Siumumeersumut siunnersortitut atorfinitsinneqarpoq
3. Tele-Postip siulersuisuini ilaasortaalerpoq

Akissutaa takuuk

Februaari:
Nuummi politiit angut 46-nik ukiulik unnerluuppaat Naalakkersuisunut siulittaasuusimasoq Aleqa Hammond aamma Inatsisartunut siulittaasoq Lars-Emil Johansenimut attuumassuteqartoq. Pisorli sumut attuumassuteqarpa?

1. Angutip politikkerit marsigarisimavai
2. Politikkerit angerlarsimaffii graffitimik titartaaffigisimavai
3. Toqutsinissamik angut siorasaarisimasutut unnerluuppaat Facebook aqqutigalugu naalakkersuisunut siorasaasisimasutut pasillugu

Akissutaa takuuk

Marsi:
Naligiissitaanermut siunnersuisooqatigiit ambassadøriisa Arpaartit inuusuttuaqqat inappaat. Inuusuttuaqqanut qanoq inassuteqarpat?

1. Arnat amerlanerusut politikkimi peqataanerulernissaat Arpaartit inassuteqarput
2. Facebookimi soqutigineqarluartoq tassa imaanut pissinneq Arpaartinit pinaveersaatigeqquneqarpoq
3. Inuusuttuaqqat atisaqarpiaratik internetimi nittarsaattaqqunagit inappaat

Akissutaa takuuk

Apriili:
Nukappiaqqat marluk inuusuttuaqqat politiinit tigusarineqarput. Sooruna?

1. Nukappiaqqat illunut sisamanut eqqarsimapput
2. Nukappiaqqat imigassartorsimallutik biilinik tillissimapput
3. Arnap 86-nik ukiullip tappiitsup angerlarsimaffiani ujajaasimapput

Akissutaa takuuk

Maaji:
Naalakkersuisoqarfimmi pisortaaneq soraarpoq. Naalakkersuisoqarfik sorleq nutaamik pisortaanertaarpa?

1. Peqqissutsimut Angallannermullu Naalakkersuisoqarfik
2. Aningaasaqarnermut Nunamullu Namminermut Naalakkersuisoqarfik
3. Inuussutissarsiornermut Aatsitassarsiornermullu Naalakkersuisoqarfik

Akissutaa takuuk

Juuni:
Greenland Express Air suleqateqarluni timmisartuussisalerpoq. Timmisartuutileqatigiiffik suleqatigineqartoq suminngaanneerpa?

1. Tyskit timmisartuutileqatigiiffiat
2. Hollandip timmisartuutileqatigiiffiat
3. Belgiamiut timmisartuutileqatigiiffiat

Akissutaa takuuk

Juuli:
Se og Hørip Kalaallit Nunaat pillugu saqqummiussaa aalassassimaarutigineqarpoq. Sumut tunngasuua?

1. Se og Hør kalaallit atisaannik aamma puisip amianik atisanik isornartorsiuivoq
2. Nunatsinni nunaqarfiit danskisut kisimi allassimavaat - aamma kukkullutik nunaqarfiit sumiinneri nalunaarsorpaat
3. Se og Hør-imi Mads Christensenip Modepoliti-mik taallugu allaatigisartakkamigut kalaallisuut illaruaatigai - tamanna akaarineqanngilaq

Akissutaa takuuk

Aggusti:
Kunngissaq ilaquttani ilagalugit Kalaallit Nunaannut pisortatigoortumik tikeraarpoq. Kunngissaq Frederik nulialu kronprinsesse Mary qassinik qitornaqarpat?

1. 3
2. 4
3. 5

Akissutaa takuuk

Septembari:
Timmisartuaraq ujaarineqartoq pingasunngornerup ualinerani nassaarineqarpoq. Timmisartuaraq septembarip aqqarnganili ujaarineqartoq taamaasilluni nassaarineqarpoq. Timmisartuaraq sumi nassaarineqarpa?

1. Narsarsuup mittarfiata eqqaani
2. Kulusuup mittarfiata eqqaani
3. Ilulissat pittarfiata eqqaani

Akissutaa takuuk

Oktobari:
18-nik ukiulik Lars Møller Kristiansen Danmarki sinnerlugu Europami pissartanngoqataavoq. Suna timersuut eqqartorneqarpa?

1. Angutini inersimasuni iligiiaarluni eqaarsaarnermi Europami pissartanngoqataavoq
2. Angutini sikkilertartuni iligiiaarnermi Europami pissartanngoqataavoq
3. Angutini skateboardernermi Europami pissartanngoqataavoq

Akissutaa takuuk

Novembari:
Inatsisartunut novembarip 28-ani qinersinermi arnat pingasut qinerneqarnerpaat qulit akornaniipput. Kikkuuppat?

1. Sara Olsvig (Inuit Ataqatigiit), Nivi Olsen (Demokraatit) aamma Naaja Nathanielsen (Inuit Ataqatigiit)
2. Sara Olsvig (Inuit Ataqatigiit), Nivi Olsen (Demokraatit) aamma Juliane Henningsen (Inuit Ataqatigiit)
3. Sara Olsvig (Inuit Ataqatigiit), Nivi Olsen (Demokraatit) aamma Doris Jakobsen (Siumut)

Akissutaa takuuk

Decembari:
Kalaallit Nunaanni timersullammattut toqqaasoqarpoq decembarip aqqaneq aappaani. Kalaallit Nunaanni Timersortartut Kattuffiata timersullammattut kina toqqarpaa?

1. Ujakkaartartoq Martin Møller
2. Ujakkaartartoq Niviaq Chemnitz Berthelsen
3. Ujakkaartartoq Frederik Petersen

Akissutaa takuuk

Aamma takuuk: Ukiortaami nalorsitsaarineq - 2013 eqqaamaviuk?

Akissutit:

• Januaari: 2 (Aalisarnermut, Piniarnermut Nunalerinermullu Naalakkersuisuusimalersumut Karl Lyberthimut Siumumeersumut siunnersortitut Tom Ostermann atorfinitsinneqarnera nalunaarutigineqarpoq)
• Februaari: 3 (Nuummi politiit Naalakkersuisut Inatsisartullu siulittaasuinik toqutsinissamik angut siorasaarisimasutut unnerluuppaat Facebook aqqutigalugu naalakkersuisunut Sermitsiaq.AG-mi isummersortarfimmi siorasaasisimasutut pasillugu)
• Marsi: 3 (Inuusuttuaqqat atisaqarpiaratik internetimi nittarsaattaqqunagit Arpaartit inassipput)
• Apriili: 1 (Nukappiaqqat illunut sisamanut eqqarsimasut politiinit tigusarineqarput)
• Maaji: 1(Peqqissutsimut Angallannermullu Naalakkersuisoqarfimmi pisortaasimasoq, Ann Birkekær Kjeldsen, pisortaanertut tunuarsimanini nalunaarutigaa)
• Juuni: 2 (Timmisartuutileqatigiiffiup Greenland Express Airip suleqataa Denim Air ACMI Hollandimeersuuvoq)
• Juuli: 3 (Se og Hør-imi Mads Christensenip Modepoliti-mik taallugu allaatigisartakkamigut kalaallisuut illaruaatigai - tamanna akaarineqanngilaq)
• Aggusti: 2 (Kunngissaq Frederik nulialu Mary sisamanik qitornaqarput: Prins Christian, prinsesse Isabella, prinsesse Josephine aamma prins Vincent)
• Septembari: 2 (Timmisartuaraq Kulusuup timmisartoqarfiata eqqaani nassaarineqarpoq)
• Oktobari: 1 (Angutini inersimasuni iligiiaarluni eqaarsaarnermi Lars Møller Kristiansen Europami pissartanngoqataavoq)
• Novembari: (Sara Olsvig (Inuit Ataqatigiit), Nivi Olsen (Demokraatit) aamma Naaja Nathanielsen (Inuit Ataqatigiit) Inatsisartunut qinersinermi taaguunneqarnerpaat qulit akornaniipput)
• Decembari: 3 (Ujakkaartartoq Frederik Petersen timersullammattut GIF-imit toqqarneqarpoq)