Skip to main content

Ukiortaami nalorsitsaarineq - 2013 eqqaamaviuk?

Ukiumi qaangiutilersumi nutaarsiassat eqqaamasaqarfiginerlugit misiliguk

Akissutaat apeqqutit ataanni imaluunniit nalorsitsaarutit aterpiaanni takukkit.
Sermitsiaq.AG-p kikkut tamaasa ukiortaami pilluaqquvai!

 

Januaari:

Taamanikkut ineqarnermut, attaveqarnermut angallannermullu Naalakkersuisoq Jens B. Frederiksen, Demokraatit, pisimasumi qitiuvoq, katillugit 60.000 koruuninik taarsiiffigineqarluni. Taarsiiffigineqarneranut suna pissutaava?

Qummoroortartut pissutigalugit tutsarlulerami Kalaallit Forsikring-imit taarsiivigitittoq
A/S Inissiaatileqatigiiffik Ini-mit taarsiiffigitikkami oqoqarnera pissutigalugu ilaatigut sofagruppia ajoquserluni
Jens B. Frederiksen toqunartulimmik nerisimagami tamatumalu kingorna sapaatit akunnerini sisamani napparsimalluni. Nammineq sillimmateqarnermigut sulinermi annaasai matussutissinneqarmata

Akissutaa takuuk

Februaari:

Inerteqquteqartitsineq pissutigalugu Nuummi Hotel Hans Egede isornartorsiorneqarpoq. Isornartorsiuineq ilaatigut akerliussutsimik takutitsinermik kinguneqarpoq. Sunaana inerteqqutaasoq?

Inini ammasumi milutsitseqqusinnginneq
Akunnittarfimmi tamarmi pujortaqqusinnginneq – aamma silataani
Nannut neqaannik sassaalleqqusinnginneq

Akissutaa takuuk

Marsi:

Siumut pingaartumillu partiip siulittaasua Aleqa Hammond marsip 12-anni Inatsisartunut qinersinermi angusarissaartorujussuupput. Taasisut procentii qassit Siumup pissarsiarai?

42,8 procent
46,5 procent
49,8 procent

Akissutaa takuuk

Apriili:

Ilulissani Mathias Storchip Aqqutaani niviarsiaraq aqquserngup sinaakkutaatigut nakkarpoq, qimuttullu pitussimasut saniannut pilluni. Niviarsiaraq suneqarpa?

Suneqanngilaq, qimmit sinimmata
Toquvoq
Sakkortuumik kiitilluni tallini napivaa

Akissutaa takuuk

Maaji:

Unnuk nalinginnaalluinnartoq angajoqqaanut kikkunnulluunniit tupassutaasorujussuanngorpoq maajip 31-anni nukappiaraq ataatsimik ukiulik Nuummi Tuapannguani napasuliani inissialiani altanimit nakkarmat. Init quleriit qassianniit nukappiaraq nakkarpa?

Sisamaannit
Tallimaannit
Arfernannit

Akissutaa takuuk

Juuni:

Leif Fontaine aalisartut piniartullu kattuffianni KNAPK-mi siulittaasutut qinigassanngorteqqinngilaq. Kina siulittaasutut nutaatut qinigaava?

Isak Vahl
Henrik Sandgreen
Hanseeraq Olsen

Akissutaa takuuk

Juuli:

Island Games 2013 Bermudami ingerlanneqarmata Kalaallit Nunaat angusai naammaginanngillat, Kalaallit Nunaanni Timersoqatigiit Kattuffianni generalsekretæri Carsten Olsen isumaqarpoq. Tuluit Det Irske Havimi qeqertaat Isle of Man medalje-nannersaavoq kuultit 36-it, sølvit 36-it bronze-llu 25-it. Kalaallit Nunaat sunik medalje-nappa?

Kuultit pingasut, sølvit pingasut bronze-llu pingasut
Kuultinnanngilaq, sølvinnanngilaq tallimanillu bronze-nappoq
Kuulti ataaseq, sølvit marluk bronze-lu ataaseq

Akissutaa takuuk

Aggusti:

Nuummi qatserisartut ikiuukkiartoqqittariaqarput unnuit ilaanni arnat pingasut qaqqamit Ukkusissanit ikiortissarsiormata. Aasap ingerlanerani Ukkusissani pisuttuartut qasseriarluni ikiortariaqarsimappat?

Sisamariarluni
Arfinileriarluni
Arfineq-pingasoriarluni

Akissutaa takuuk:

Septembari:

Svend Hardenberg Nukissiorfinni atorfimminit tunuarpoq, taamaanngippat soraarsitaassagami. Ingerlatsiviup biilianik imminut atugassaqartissimavoq akeqanngitsumillu mobil-eqarlunilu internet-eqarsimalluni, tamanna aviisip Atuagagdliutit/Grønlandsposten-ip oqaluttuaraa. Svend Hardenberg ullumikkut suleriva?

Air Greenlandimi pisortaaneq
Siulittaasup Naalakkersuisoqarfiani pisortaq
Qaasuitsup Kommuniani pisortaq

Akissutaa takuuk

Oktobari:

Eqqortoq eqquissuunngilaq kujataani politikerit marluk Jørgen Wæver Johansenip Gerhardt Petersenillu immiaaraliartik Nanoq Beer ussassaarutigimmassuk ´kalaallit immiaaraattut´. Tassami selskabip immiaaraliaa kimittuneq kilometerinik tusintilinnik ungasissusilimmi immiorneqarpoq, pisortaq Atassutillu siulittaasua Gerhardt Petersen paasissutissanik saqqummiussivigineqarami nassuerpoq. – Sermersuup ernganik umiarsuarmik nassiussisarsimavugut, taakkua nassuiaapput. Sermersuup ernga sumut nassiunneqartarsimava?

Nunavummut
Walesimut
Savalimmiunut

Akissutaa takuuk

Novembari:

KNR-p pisortarisimasaa Ivalo Egede ukiut nikinnerannit attaveqarnermut pisortatut atorfinitsinneqarpoq. Sumi?

Tele-Post
Royal Greenland
Air Greenland

Akissutaa takuuk

Decembari:

Kalaallit Nunaat nammineq Hall of Fame-qalerpoq, nunatsinni timersortartut piffiit ingerlaneranni tusaamasaanerpaasarsimasunik nersuiniarfik. Hall of Fame-mi OL-imi VM-imilu peqataasarsimasut siulliullugit aqqi naqinneqarput. Sisoraatinik oqilaniuttartuusimasoq Michael Binzer, Nuummeersoq, Elite Sport Greenlandimit toqqarneqartut ilagaat. Taanna kalaallini kisiartaalluni ukiuunerani OL-mi x-eriarluni peqataasarsimavoq: Qasseriarluni peqataasarami?

Marloriarluni
Pingasoriarluni
Sisamariarluni

Akissutaa takuuk

 

Akissutit tamarmik:

Januaari: 2 (A/S Inissiaatileqatigiiffik INI taarsiissuteqarpoq illuata oqoqarnera pissutigalugu ilaatigut Jens B. Frederiksenip sofagruppia ajoquserlugu).
Februaari: 1 (Nuummi Hotel Hans Egedemi inini ammasuni milutsitseqqusinnginneq)
Marsi: 1 (Inatsisartunut qinersinermi Siumut taasisut 42,8 procentiinit taaneqarpoq)
Apriili: 3 (niviarsiaraq sakkortuumik kiitikkami tallini napivaa)
Maaji: 3 (nukappiaraq quleriit arfernanniit nakkarpoq)
Juuni: 2 (Henrik Sandgreen KNAPK-mi siulittaasunngorpoq)
Juuli: 3 (kuulti ataaseq, sølvit marluk bronzelu ataaaseq)
Aggusti: 1 (sisamariarluni)
Septembari: 2 (Svend Hardenberg ullumikkut Siulittaasup Naalakkersuisoqarfiani pisortaavoq)
Oktobari: 2 Sermersuup ernga Walesimukaanneqartarsimavoq)
Novembari: 1 (Ivalo Egede ukiut nikinnerannit Tele-Postimi attaveqarnermut pisortanngussaaq)
Decembari: 2 (sisoraatinik oqilaniuttartoq Michael Binzer pingasoriarluni ukiuunerani OL-mi peqataasarsimavoq

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER