Ukiortaami ilassinninnissamut Aaja qaaqqusivoq
Kalaallit Nunaannit folketingimut ilaasortaq, Aaja Chemnitz Larsen (IA) kalaallit Danmarkimi najugaqartut tamaasa januaarip arfineq-aappaani ukiortaami ilassinninnissamut qaaqqussallugit aalajangerpoq.
Ukiortaami ilassinninneq Christiansborgimi, ualikkut tallimaniit arfineq-marluk qeqqata tungaanut ingerlanneqassaaq, kikkullu tamarmik – qanorluunniit tunuliaqutaqaraluarunik – tikilluaqqusaapput, Aaja Chemnitz Larsen tusagassiutinut nalunaarummini ilisimatitsivoq.
Folketingimi ilaasortaq tikilluaqqusissaaq ukiorlu qaangiussimasoq kingumut qiviarlugu, kingorna erinarsoqatigiit Aavaat tussiarumaarput, mamartunillu tamulugassaqassalluni.
Ataqatigiinneq
- Ukiortaami ilassinninnissaq kalaallit Danmarkimiittut akornanni katersuunnissaq ataqatigiinnissarlu siunertarivaa. Saniatigut aamma kalaallit Danmarkimiittut politikkikkut suliffeqarfiat takussavaat paasisaqarfigalugulu, Aaja Chemnitz Larsenilu Kalaallit Nunaat sinnerlugu Christiansborgimi sulinera ilisimasaqarfiginerulissallugu, tusagassiutinut nalunaarummi allassimavoq.
Inissat killeqarmata peqataanissamut nalunaarnissaq pisariaqarpoq. Mailimut uunga nalunaartoqarsinnaavoq: naia@ft.dk.