Ukiorpassuit oqallittoqareersoq: Umiatsiaararsorlutik aalisartut tamarmik maanna pisassinneqartalissasut
Naalakkersuisut akissuteqaateqarnerminni paasissutissiissutigaat, aalisariutit ataasiakkaat, umiatsiaaraangunik anginerungaluarunilluunniit aalajangersimasumik pisassinneqartalernissaat sulissutigineqartoq
Henrik Fleischerip Siumumeersup aalajangiiffigisassatut sunnersuutaanut atatillugu Naalakkersuisut akissuteqarnerminni paasissutissiissutigaat, aalisarnerup iluani piffissaq ungasinnerusoq eqqarsaatigalugu qanoq periusissiaqarnerlutik.
- Angallatinut ataasiakkaanut aalajangersimasumik pisassiissuteqartitsilluni malittarisassaqartitsinermi iluaqutit arlallait Naalakkersuisut imaaliinnarlutik takusinnaavaat, allakkiami taamatut allassimasoqarpoq, tassani innersuussutigineqarpoq, Avannaani pæitsaasunik misilittaqarluni angallatit 6 meterit sinnerlugit takissusillit atorlugit sinerissap qanittuani maannakkut ukiorpassuarni raajarniartoqarnikuusoq qaleralinniartoqarnikuullunilu.
Paggatassiilluni aalisartitsisarunnaartoqassasoq
- Akerlianik umiatsiaaqqat mikinerusut atorlugit ataatsimut pisassiissutinik ataatsimoorullugit aalisarnerat aalisarlersinnaanerallu annertunerusumik annikinnerusumilluunniit killeqannginnera ajornartorsiutitaqarpoq, akissuteqaammi erseqqissaatigineqarpoq.
Naalakkersuisut periusissiaminnut tunngavilersuutigaaqt, pingaarnertut anguniagaasoq ”piffissaq sivisooq eqqarsaatigalugu aalisarnerup piujuartisinissaq tunngavigalugu ingerlanneqarnissaa”.
- Tamanna ilaatigut anguneqarsinnaavoq sinaakkutaasunik imminnut atasunik allanngoranngitsunik atugassartitsinikkut, tassani nalornineq annikillisinneqassalluni, taamaalilluni aalisarnerup ineriartorteqqinnissaanut iluaqutaasumik aningaasaliinissaq pilerinartunngortinneqassallunni. Taamaaliortoqassaaq aningaasaliisarnernut qulanaatsumik qularnaveeqqusiisoqartartinniarlugu aalisarsinnaassuseqarluarnerlu siuarsarniarlugu, inuussutissarsiortut taamaalillutik aalisariutaatitik aserfallatsaaliorsinnaanissammatigit nutaalianillu taarserartuarlugit, taamatut tunngavilersuuteqarput.
Aalajangiiffigisassatut siunnersuut
Akissuteqaammi aalajangiiffigisassatut siunnersuut tunngavigineqarpoq, tassani Henrik Fleischer Inuussutissarsiutigalugu aalisarnikkut angallateeqqanik kvogeqartussanik minnerpaaffiliinissami takissuseq 9 meter aallaavigalugu pitsaaqqutinik ajoqutinillu nassuiaateqaqqullugit ukiuni 12 ikaarsaariarfeqartillugit Naalakkersuisut nalunaarusioqqullugit peqqusimavai.
Naalakkersuisut aalajangiiffigisassatut siunnersuut akuersaarpaat, nassuiaallu ujartorneqartoq suliarineqassasoq ilisimatitsissutigalugu. Siunnersuut novembarip arfernani Inatsisartuni siullermeerlugu suliarineqassaaq.