Tele-Post
Ukiorluunikuunera Tele-Postimut suli ajornartorsiortitsivoq
Tele-Postip ineriartortitsinissamut pilersaarusiani annertooq, kalaallit 92 procentiisa Kitaata sineriaani - Nanortalimmit Upernavimmut - sukkasuunik nioqquteqalernissamik qulakkeerinnittussap iluatsinnissaa neriuutigaa.
Kisianni ukiorluunera sermeqangaatsiarneralu Tele-Postip sulisuinut immikkut ittumik ilungersornartumik atugassaqartitsivoq, taakku Kitaata avannarpasinnerusortaani nutaamik sakkortusaavimmik qaammataasanik taarsiisussanik pilersitsisussaapput. Umiarsuit atortussanik pisariaqartunik apuussinissaminnik ajornakusoortitsipput.
Piffissaliussaq sivitsorsinnaasoq
Taamaammallu piffissaliunneqartoq sivitsorsinnaavoq. Suliap naammassinissaa decembarip aallaqqaataanut inissinneqarnikuugaluarpoq.
- Kisianni ajoraluartumik anori silalu aqussinnaanngilagu, pisortaaneq Krisitian Davidsen ingerlatseqatigiiffiup ataatsimeersuarnerani nassuiaavoq, taassumalu piffissamut pilersaarusiap najoqqutarineqarsinnaaneranut suli neriuuteqarpoq.
Kristian Davidsenip assit Frankrigimeersut takutippai, tassani immap naqqatigut kabelissaq nutaaq suliarineqaleruttorpoq, juunimit septembarip tungaanut Nuummiit Aasiannut attaveqartitsilissaaq.
350 millionit koruuninik aningaasaliineq
Sulineq ukiormannaannaq 350 millionit koruuninik akeqarsimasoq naammassineqarpat, innuttaasut 92 procentii Nuummi innuttaasunitut sukkasuumik atassutinik nioqqutinik pissarsisinnaanngussapput.
Tamatuma saniatigut Kitaata sineriaani qaammataasat atorneqarunnaartussaammata Kangiata sineriaani pitsanngorsaasoqalaassaaq. Tunumi innuttaasunut tamakkiisumik aaqqiissutaanngitsoq pisortap nassuerutigaa, kisianni Tele-Post qaammataasanut tunngatillugu issittumi suleqatigiinnermut peqataavoq, tamannalu pitsaanerusumik aaqqiissuteqartoqarnissaanut neriuuteqarfigineqarpoq.
- Maannakkorpiaq annerrtuumik pitsanngoriaateqartoqarnissaanik neriorsuuteqarsinnaanngilanga, Kristian Davidsen oqarpoq.
Nunaqarfinni telefonit atorunnaassapput
Nunaqarfinni minnerusuni innuttaasunut oqarasuaatit angallattakkat siunissaapput. Tele-Postip telefoninik atuineq kigaatsumik atorunnaarsikkiartuaarniarpaa. Tamanna ingerlatseqatigiiffiup pisariillisaanissamut periusissiaanut ilaavoq.
Innuttaasut ullumikkut immap naqqatigut kabelip eqqaaniittut mobilip attavianik 30 Mbit/sekundinik pissarsisinnaapput. Ingerlatseqatigiiffiup ukiuni tulliuttuni sukkassuseq 2020-p tungaanut ukiut tamaasa 10 Mbit/sekundimik qaffattarniarpaa, taamaalilluni 60 Mbit/sekundit anguneqassallutik.