Ukioqqortunerit akiuussuseqqinnissaat nakorsaanerup kaammattuutigaa

Innuttaasut 50-inik sinnerlugilluunniit ukiullit kiisalu innuttaasut inuunerup sinnera nappaateqarlutik sanngiinnerusut Covid-19-imik tunillatsissagaluarunik atuipilunnerusinnaammata, akiuussutissamik kapiteqqinnissamut ulluni makkunani neqeroorfigineqaqqipput.

Nunatta nakorsaanerata Henrik L. Hansenip erseqqissaatigaa ilisimatusarluni misissuinerit tunngavissaqarluartut takutikkaat innuttaasut ukioqqortunerusut akiuussutissamik kapitinnikkut napparsimarulunnginnissamut illersuuteqalersartut.

- Covid-19-ip tuniluutilerneraniilli misilittakkat tamarmik takutippaat akiuussutissertissimasut perulunnginnerusartut, ukioqqortunerusullu peruluutiginnilinnginnissaanut illersorneqarluarsinnaasut. Nunatsinni akiuussusersuisimanngitsuugutta tuniluuttoqarnera allatorluinnaq misigisimassagaluarparput, Henrik L. Hansen oqarpoq.

Omikron qaammatit aqqanilissaani suli atuunneruvoq

Henrik L. Hansen ilisimatitsisvoq Covid-19-imut akiuussutissaq nualluutinut coronavirusineersunut assigiinngitsunut atuutereersimasunut illersuutaasoq, aammali omikronimut illersuutaalluni.

Nakorsaanerup tikkuarpaa coronavirusip allannguutaa omikron suli atuunnerugallarnissaa ilimanartoq.

- Pissutsit aalajaalluinnarnerat maanna takusinnaavarput, coronavirusimmi allannguutaa omikron december 2021-mili annertunerusumik atuutilerami, suli tuniluunneruvoq. Omikronip kingorna allamik allannguummik tuniluuttoqarnerulernissaa naatsorsuutigineqanngikkallarpoq. Neriuutigisinnaavarput Covid-19-ip tuniluunnerata naggatissaa tikilersimagipput, Henrik L. Hansen, akiuussusertittut aammaarlutik akiuussuseqqinneqarumaarnissaannut tunngatillugu aperineqarami akivoq.

Nunatta nakorsaanerata ilisimatitsissutigaa Covid-19-imik tunillatsissimasut ataasiakkaat napparsimmavimmut aasap ingerlanerani unitsitaasarsimasut. Tuniluunnerli maanna annertuneruleriartoqqilersoq.

Tuniluunneq avaqqunneqarsinnaanngilaq

Nunatta nakorsaaneqarfia antigentestit ilai aamma peqqinnissaqarfimmi PCR atorlugit misissuinerit pillugit suli ilisimatinneqartarpoq.

- Omikronip tuniluunnissaa pinngitsoortivissinnaanngilarput. Ukioqqortunerilli utoqqaallu akiuussusernerisigut peruluttoqalernissaanut aarlerinaat annikillisarsinnaavarput, oqarpoq.

Taassuma ilanngullugu oqaatigaa innuttaasut 65-nik sinnerlugilluunniit ukiullit influenzamut akiuussusertinnissamut aamma neqeroorfigineqartut.

Nuummi innuttaasut maanna neqeroorfigineqartaarput, akiuussutissinneqarnissamullu neqeroorfigineqartut sms-innattassallutik.