Ukioqqortunerit affaat ataallugit akiuussuserteqqissimapput

Covid-19-imut akiuussusersuineq ukiaq manna ingerlanneqaleruttorpoq. Innuttaasut 50-ilereersimasut aamma innuttaasut perulunnissamut aarlerinaateqartut 50-iliisimanngitsut coronavirusimut akiuussusertinnissamik neqeroorfigineqarput. Innuttaasut 65-ileereersimasut aamma influenzamut akiuussusertinnissamut neqeroorfigineqarput.

Innuttaasulli 50-ileereersimasut sisamassaat akiussusertinnissamut akuersisut affaat ataappaat. Tamanna isumaqarsinnaavoq ukioqqortunerusut amerlanerusut peruluutigisaminnik napparsimalersut, nunatta nakorsaanera Henrik L. Hansen oqarpoq.

- Ukioqatigiinni akiuussusertittut siornamit ikinnerummata, januar-marts 2022-mi napparsimmavimmi uninngasunit amerlanerusut maanna uninngatinneqartariaqalersinnaapput, nunatta nakorsaanera Henrik L. Hansen oqarpoq.

Region Diskomi kapitittut ikinnerusut

Peqqinnissaqarfiup nunatsinni immikkoortortaqarfiini innuttaasut 50-ileereersimasut ukiaq manna akiuussusertissimasut amerlassusaat nikerangaatsiarput.

Naatsorsuinerup takutippaa Region Diskomi 50-ileereersimasut 32,8 procentii sisamassaat akiuussusertissimasut. Region Qeqqani ukioqatigiiaat 60,4 procentii akiuussuserneqarsimapput.

Nuna tamakkerlugu innuttaasut 50-ileereersimasut 7.987-it sisamassaanik akiuussuserneqarsimapput. Tassa ukioqatigiiaanni 44,9 procentii.

Innuttaasulli 65-ilereersimasut qiviarutsigit, ukiaq manna akiuussuserneqarsimasut 3.175-iupput, tassa ukioqatigiiaanni 58,8 procentii.

- Innuttaasut 65-ileereersimasuni akiuussuserteqqissimanngitsut amerlapput. Covid-19-ip inuiaqatigiinni qanoq tuniluukkumaarnera, qanorlu kinguneqarumaarnera maannakkorpiaq naatsorsoruminaappoq, nakorsaaneq oqarpoq.

Akiuussuserteqqittut ikiliallattartut

Henrik L. Hansen nassuiaavoq Danmarkimut sanilliutissagaanni, innuttaasut 50-ileereersimasut sisamassaat akiuussusertissimasut procentinngorlugit ikinnerusut. Danmarkimi 50-ileereersimasut 67,7 procentii sisamassaanik akiuussusertinnissamut akuersisimapput.

Akiuussuserteqqittarnermulli kajuminneq ukioqqortunerusuniinnaq annikilliartortannitsoq, Henrik L. Hansenip nassuiaatigaa. Inuusunnerusut kapiteqqittarnerat aamma annikilliallattarpoq.

Akiuussuserneqarsimasut kisitsisinngorlugit:

• Inuit 18-ileereersimasut 40.580-it siullermeertumik kapitissimapput (87%)
• Inuit 18-ileereersimasut 38.236-it aappassaat kapitissimapput (83%)
• Inuit 18-ileereersimasut 23.214-it pingajussaanik kapitissimapput (54%)

Covid-19-imut akiuussuserneqaqqinnissamut kajuminnerup appariaallattarneranut pissutaasinnaasumik nakorsaaneq oqaatigisaqarpoq.

- Akiuussusernissamut neqeroorummik akuersisannginneq pillugu misissuisoqarnikuunngilaq. Taamaattoq nalunngilarput coronamut akiuussutigineqartoq influenzamut akiuussummut sanilliullugu sakkortunerusunik sunniuteqarsinnaasartoq. Sunniutaasartut pissutigalugit innuttaasut immaqa akiuussuserteqqikkusuttanngillat, Henrik L. Hansen oqarpoq.

Taassuma ilanngullugu erseqqissarpaa allannguut Omikroniusoq sakkukinnerusumik napparsimatitsisarnera pissutiginnguatsiarlugu innuttaasut akiuussuserteqqissimanngitsut amerlanerusinnaasut.

Akiuussusertinnissaq kaammattuutigaa

Tunillaassuunneq napparsimasarnerlu maanna sakkortorpasinngikkaluartut, taamaattoq akiuussusertittoqartarnissaa nunatta nakorsaanerata suli kaammattuutigaa. Innuttaasut 50-ileereersimasut covid-19-imut akiuussusertinnissaannut peqqinnissaqarfik suli neqerooruteqarpoq, nakorsaanerullu tamanna tigulluaqquaa. Sumi qaqugukkut akiuussusertittoqarsinnaanersoq nunatta nakorsaaneqarfiata nittartagaani takuneqarsinnaavoq.

Innuttaasut 65-ileereersimasut 2.124-it influenzamut aamma akiuussusertissimapput. Tassa ukioqatigiiaanni 38,9 procentii.