2022 tassaavoq corona peqqutigalugu ukiuni marlunni matoqqareernerup kingorna ukioq siulleq. Taamaakkaluartoq umiarsuit takornariartaatit 48-it tikipput, aatsaat taama amerlatigalutik.

Aviisi Sermitsiaq taama allappoq.

- Tupaallannarpoq matoqqareernerup kingorna taama sukkatigisumik amerlatsimmata, umiarsuarnik takornariartaatinik amerlaqisunik kiffartuussisumik Tupilak Travelimik piginnittoq, Henrik Skydsbjerg, oqarpoq.

- Ukiorli manna amerlanerussapput. Maannamut umiarsuit takornariartaatit 72-it Nuummiinnaq nalunaarsimapput. Umiarsuaatileqatigiit nutaat arlaqarput. Assersuutigalugu Italiamiut umiarsuaatileqatigiiffiat Costa kingullernik 2010-mi Nuummiittoq.

- Costa umiarsuarmik ilaasunut 3700-nut inissaqartumik tikissaaq, tassalu umiarsuit tikeraarsimasut annersarigunagaat, Henrik Skydsbjerg oqarpoq.

Taanna tassaavoq umiarsuaq Costa Favolosa, Visit Greenlandip umiarsuarnik takornariartaatinik nalunaarsuiffia malillugu juulip 21-ani Nuummut tikittussaq. Matumani nalunaarutigineqarpoq umiarsuaq 4.880-inik ilaasoqarsinnaasoq, tassa inuttat ilanngullugit.

- 2010-mi maaniikkamik Nuutoqqap avataaniipput umiatsiaminnillu takornariat nunamukaassorlugit. Ukiorli manna talittarfimmut tulassapput. Aamma 2024-mi takkunniarlutik nalunaarsimapput. Umiarsuarnik takornariartaatinik sullitatta nutaat ilagaat, Nuummi angallanniarlugit isumaqatigiissuteqarfigisavut. Ulluni marlunni illoqarfimmiinneranni angalaarussinerit 2000-init amerlanerussagunarput. Umiarsuup Nuummiinnerata saniatigut aamma Qaqortumut tikissaaq, ilisimatitsivoq.

Allaaserisaq tamaat Sermitsiami saqqummersumi kingullermi atuaruk, uani:

Sermitsiaq - 10/03-2023

Klik her for at læse