Ukioq manna takornariaqarnikkut pisinnaasut pingasut
Coronap tuniluunnera takornariartitsinermut qanoq sunniuteqarsinnaanera nalornissutigineqarmat, Visit Greenland Coronamut atatillugu Allattoqarfik peqatigalugu ukioq manna qanoq pisoqarsinnaaneranik eqqoriaasimavoq.
Coronap nunami aqunneqarsinnaanngitsumik tuniluutilersinnaanera pinngitsoortinniarlugu aatsaavissuaq taamak amerlatigisunik killilersuisoqarnerata malitsigisaanik apeqquterpassuit akissutissaqartinneqanngillat.
Takornariartitsisartunut takornariaqarnermullu atatillugu suliffeqarfittut suliaqartartunut qitiusutut apeqqutaasoq tassaavoq, Kalaallit Nunaanni takornariartitsisarnerup qaqugu aallarteqqissinnaanera.
- Akissutissanik arlalinnik amigaateqarpugut, takornariaqarnerup 2021-mi qanoq ingerlanissaanik takutitsisinnaasunik, maannakkorpiarlu akissutissanik peqartoqanngilaq. Taamaammat sapinngisatsinnik takorluukkanik sanaartorsimavugut, piffissaq takornariaqarfigineqartartoq qanoq isikkoqassanersoq eqqoriarlugu – ajunngitsutigut ajortutigullu, Visit Greenladimi pisortaagallartoq Mads Skifte tusagassiorfinnut nalunaaruteqarnermi oqaluttuarpoq.
Visit Greenland pisinnaasunik pingasunik eqqoriaasimavoq, takornarialerisartut pilersaarusiornerminni atorsinnaasaannik.
Ajornerpamik pisoqarpat
Umiarsuarnik takornariartaatit: 2021-mi umiarsuarnik takornariaqarneq ammarneqanngitsoorpoq.
Nunakkut takornariat: Inuit sapinngisamik amerlanerpaat julimi illersuummik kapitereersimappata Danmarkimiit/mut timmisartuussinerit nalinginnaasumik ammarneqassapput (sap. ak. arlallit tamanna kinguaattoorsinnaavoq). Angalasut tamarmik illersuummik kapineqarsimanerminnik uppernarsaammik pas-eqassapput.
Eqqoriaanerup ilimanassusaa 80%-mut inissinneqarpoq.
Akunnattumik pisoqarpat
Umiarsuarnik takornariartaatit: Innuttaasut amerlanerpaartaat julimi (sap. ak. arlallit kingusinaarsinnaavoq) illersuummik kapitereersimappata umiarsuit takornariartaatit tikittalernissaannut ammaasoqassaaq. Ilaasut tamarmik illersuummik kapineqarsimanerminnik uppernarsaammik pas-eqassapput.
Nunakkut takornariat: Inuit sapinngisamik amerlanerpaat julimi illersuummik kapitereersimappata Danmarkimiit/mut timmisartuussinerit nalinginnaasumik ammarneqassapput (sap. ak. arlallit tamanna kinguaattoorsinnaavoq). Angalasut tamarmik illersuummik kapineqarsimanerminnik uppernarsaammik pas-eqassapput akunnerillu 72 sioqqullugit misissorneqarsimanerminnit coronaqannginnermut akissummik pereersimassallutik.
Eqqoriaanerup ilimanassusaa 15%-mut inissinneqarpoq.
Ajunnginnerpaamik pisoqarpat
Umiarsuarnik takornariartaatit: 18. april 2021, tusarliussanut piffissarititaasoq qaangiuppat, umiarsuit takornariartaatit tikittalernissaannut ammaasoqassaaq. Ilaasut tamarmik illersuummik kapineqarsimanerminnik uppernarsaammik pas-eqassapput.
Nunakkut takornariat: 18. april 2021, tusarliussanut piffissarititaasoq qaangiuppat Danmarkimiit/mut timmisartuussinerit nalinginnaasut ammarneqassapput. Angalasut misissorneqarsimanerminnit coronaqannginnermut akissummik pinissap tungaanut mattusimanissaat piumasaqaataassaaq, Kalaallillu Nunaannut tikinnermiit ullut tallimat qaangiuppata misissorteqqissallutik.
Eqqoriaanerup ilimanassusaa 5%-mut inissinneqarpoq.
Eqqoriaanermut tunngavigisaq
Visit Greenlandip eqqoriaanerminnut tunngaviusimasut imatut oqaatigai:
Takorluukkat pingasut tassaapput ajunnginnerpaamik, akunnattumik aamma ajornerpaamik pisoqarsinnaaneranut eqqoriaanerit – Covid-19-qarnerani killilersuinernut takornaiaqarnermullu tunngatillugit. Saniatigut eqqoriaanerit ilimanassusaat procentinngorlugit inississimavagut, ukua uuttuutinut sanilliullugit: Kalaallit Nunaanni illersuummik kapitittarnerit, nunarsuaq tamakkerlugu illersuummik kapitittarnerit, illersuummik kapineqarsimanermik uppernarsaammik pas-imik pilersitsinerit, napparsimaveqarfinni inissaqartitsineq, il.il.
Erseqqissaassutigineqarpoq Namminersorlutik Oqartussat angalasinnaanermut killilersuinerit pillugit paasissutissanik nalunaaruteqarnissaat, 18. April pisussaq aalajangiisuussasoq.