qinersineq
Ukioq manna ikinnerulaartut qinersiartorput
Inatsisartunut qinersinermi qinersisinnaasut 72,9 procentii qinersiartorput
Ukioq manna Inatsisartunut qinersinermi Kalaallit Nunaanni qinersinermi peqataasarnerup Nunanut Avannarlernut sanilliullugu nuanninngitsumik inissisimanera allanngortinneqanngilaq.
Tallimanngormat qinersinermi qinersisinnaasut 40.424-t 72,9 procentii qinersiartorsimapput, 2013-imi marsip 12-ianni Inatsisartunut qinersinermi 74,2 proceentit qinersiartorsimapput, tamanna takuneqarsinnaavoq valg.gl-imi.
Danmarkimi folketingimut qinersinerni kingullerni marlunni 86,0 aamma 86,9 procentit taasiartorsimapput, savalimmiunilu lagtingimut qinersinerni kingullerni marlunni 89,3 procentit aamma 86,4 procentit qinersiartorsimapput.
Nunat Avannarliit
Nunat Avannarliit tamaasa qiviarutsigit Kalaallit Nunaata Åland aamma Finland qaangerpai, taakkunani qinersinerni kingullerni marlunni Ålandimi 67,8 procentit aamma 66,9 procentit qinersiartorsimammata, Finlandimilu 64,6 proentit aamma 67,0 procentit qinersiartorsimallunik.
Kalaallilli Nunaat nunanit avannarlernit allanit qaangerneqarpoq: Qinersinerni kingullerni marlunni Islandimi 82,3 aamma 82,1 procentit, Sverigemi 80,6 aamma 83,7 procentit Norgemilu 76,0 aamma 77,9 procentit, tamanna takuneqarsinnaavoq Nordisk Statistisk Årbog 2014-imi.