Ukioq manna aputip sisoorneratigut ajunaartoqassasoq siulittuutigigaat
Nuummi qamuteralattartut peqatigiiffiata aputip sisoorneranut upalungaarsimanermut akisussaaffik tiguaa. Aputip sisoorneranik immikkut ilisimasallip oqartussaasut pimoorussinnginnerat apeqquserpaa.
Kalaallit Nunaanni sumiluunniit aputip sisoorneranut upalungaarsimasoqanngilaq, aali ukiumut arlallit apummit sisoortumit eqqorneqartaraluartut. Apeqqutaaginnarpoq qaqugu tamanna inuup inuuneranik akeqarumaarnersoq, Nuummi qamuteralattartut peqatigiiffiata Qamutit SAR-imut upalungaarsimaffia aamma sisorarnermik ilitsersuisoq aputinillu sisoortunik immikkut ilisimasalik Anders Lee Jørgensen isumaqarput.
Aviisi AG taama allappoq.
Politiit upalungaarsimaffianni aputinut sisoortunut upalungaarsimaneq ilaanngilaq, innersuussutigineqarporli Inatsisartut inatsisaat, tassani allassimammat ajunaarnersuaqartillugu politiit ataqatigiissumik suliniuteqartassasut, tamatumani pinngortitami ajunaarnersuit, aputip sisoorneratut ittut, ilanngullugit.
Namminersorlutik Oqartussani attaveqarnermut naalakkersuisoqarfiup aputit sisoornerannut upalungaarsimaneq isumagisussaasimavaa, tassanngaanniilli DMI-mut innersuussisoqarpoq, taanna aputit sisoortut samminissaannut naalagaaffimmit qanittukkut aningaasanik tunineqarsimammat.
Nuummili DMI-p tamanna tusarsimanngilaa, Danmarkimilu qullersaqarfimmut innersuussilluni, taannalu aviisip saaffiginninneranut suli akissuteqanngilaq.
Kina akisussaava?
Nunarsuarmi sumiiffinni allani sumunnarfiup kommunilluunniit aputip sisoorneranut upalungaarsimaneq akisussaaffigisarpaat, Anders Lee Jørgensen oqarpoq, taannalu Frankrigimi qaqqarsuarni Alpini sulisimavoq.
- Alpini upalungaarsimalluartoqarpoq, sisorarnermik ilitsersuisut tamarmik amuartaatinilu sulisut tamarmik ilinniagaqartinneqarsimallutik aputillu sisoornerani upalungaarsimasunut ilaallutik, taamaattumik annertuumik ajutoortoqartillugu tamarmik sianerfigineqartarput, taavalu takkuttarput bipperit, sondet nivaatarlu nassarlugit, taavalu ujaasilersarlutik, Anders Lee Jørgensen oqaluttuarpoq, taassumalu maani taamatut suliniuteqartoqarnissaa kissaatiginartippaa.
- Kissaatiginartippara politiit nunallu iluani ujaasinermut annaassiniarnermullu akisussaasut tamanna tigussagaat upalungaarsimanerminnullu ilanngullugu, taanna oqarpoq.
Aviisimi AG-mi atuarnerusinnaavutit: