Ukioq manna aamma sivisuumik tuttunniarsinnaassaagut
Ukioq manna sumiiffiit ilaanni kulavaat norrallit piniarneqarsinnaassapput, nutaamillu tuttut angutivissat oktobarimi nuliunerisa nalaani piniaqqusaassanngillat.
Sunngiffimmi piniartut ukioq manna aamma 31. oktobarip tungaanut tuttunniarsinnaassapput inuussutissarsiutigalugu piniartut 31. decembarip tungaanut. Tuttulli angutivissat oktobarimi nuliunerisa nalaanni piniarneqarsinnaassanngillat.
Ukiut siuliini tuttut angutivissat nuliusut aallaaneqarsimasut qimaannarneqartarnerinik nalunaaruteqartoqartarneranik tamanna pissuteqarpoq.
Piniarneq pisarnertut 1. aggustimi aallartissaaq.
Sumiiffiit ilaanni kulavaat norrallit pisarineqarsinnaapput
Piniarfik 2, 3 aamma 4-mi inuussutissarsiutigalugu tuttunniarneq aggustip aallaqqaataani aallartissaaq decembarip 31-at ilanngullugu ingerlassalluni.
Ukiup siulianut sanilliullugu akerlianik kulavaat norrallit piniarfik 3-mi aamma 4-mi piniarneqarsinnaassaapput.
Piniarfik 1, 5, 6, 7, 8 aamma 11-mi inuussutissarsiutigalugu tuttunniarneq aggustip aallaqqaataani aallartissaaq oktobarip 15-iat ilanngullugu ingerlassalluni. Sunngiffimmi tuttunniarneq aggustip aallaqqaataani aallartissaaq septembarip 30-at ilanngullugu ingerlassalluni.
Piniarfinni taakkunani kulavannik norralinnik piniarneq inerteqqutaavoq.
Piniarfik 9 aamma 10, Kangerluarsorujuk, Nuna Prudhoe aamma Nuna Inglefieldimi inuussutissarsiutigalugu aamma sunngiffimmi tuttunniarneq aggustip aallaqqaataani aallartissaaq decembarip 31-at ilanngullugu ingerlassalluni. Tassani kulavaat norrallit piniaqqusaanngillat.
Akuersissutit pisanik nalunaarutinik tunniussisartut ikippallaartut
Tuttunniarnermiit akuersissutit pisanik nalunaarummik immersorneqarsimasut kommuninut sullissivinnut utertinneqartartut ikippallaarujussuartut, naak tamanna inatsisitigut piumasaqaataagaluartoq, Piniarnermut Aalisarnermullu Naalakkersuisoqarfik ilisimatitsivoq.
Tamanna naammaginanngilluinnarpoq, taamaammat tuttut qasserpiaat pisarineqartarnersut APN-imit aamma Pinngortitaleriffimmit nalileruminaatsinneqartupilussuupput.
Inatsisip sukaterneqarnissaa suli sulissutigineqarpoq, taamaalilluni pisanik nalunaaruteqarsimanngitsunut pillaateqarnissamut periarfissaqalissammat, taama nalunaaruteqartoqarpoq.
Tuttunniarneq umimmanniarnerlu pillugit paasissutissat amerlanerusut Naalakkersuisut nittartagaanni UANI takuuk.