- Ukiakkut ataatsimiinneq politikkikkut aaqqiagiinngiffiusoq

Siumumi aalassassimaartoqarnera Inatsisartuni sulinermi eqquisinnaasoq Inuit Ataqatigiit aamma Demokraatit isumaqarput

Ukiaanerani ataatsimiinneq aaqqiagiinngiffiusinnaasoq Inuit Ataqatigiit aamma Demokraatit isumaqarput.

Inatsisartuni ilaasortap Anders Olsenip Kim Kielsenimik suli tatiginninnginnera pissutaalluni aaqqiagiinnginneq annertusinnaasoq partiit isumaqarput.

Aaqqiagiinngiffiunissaa ernumanarpoq

- Naalakkersuisut iluini aaqqiagiinngittoqarnera Naalakkersuisunut tapertaasutut ernumananngitsuunngilaq, Siumup Inatsisartuini amerlanerussuteqartut Kim Kielsenimut tatiginnikkunnaarsimanerat innersuutigalugu Justus Hansen Sermitsiaq.AG-mut oqarpoq.

Inatsisartut ukiaanerani ataatsimiinneranni Siumumi aaqqiagiinngittoqarnera sunniuteqassasoq Múte B. Egede oqarpoq.

- Naalakkersuisooqatigiit patajaanngitsut kikkulluunniit takusinnaavaat. Siumumi ilaasortat arfineq marluk Inatsisartut ataatsimiinnerat aallartippat qanoq iliuuseqassanersut ilisimanngilarput, oqarpoq.

- Nunatsinnut iluaqutaanngitsoq

Siumumi aaqqiagiinngissutaasut iluarsiniarlugit Siumumi ilaasortat arfineq marluk partiip siulersuisuuneri naapissavai. Ataatsimiinneq septembarip 20-aatinnagu pissaaq. Siumumi aaqqiagiinnginnerit iluarsiumaarnissaat Justus Hansenimit Múte B. Egedemiillu ilimagineqanngilaq.

- Siumumi aaqqiagiinngittoqarnera ataatsimiinnermut sunniuteqarumaartoq ernumagaara, Justus Hansen Sermitsiaq.AG-mut oqarpoq.

Kim Kielsen tatigilissanerlugu imaluunniit tatiginninnginnermik taasititsisoqassanersoq Siumumi ilaasortat suli avammut oqariartuuteqarnikuunngillat. Siumumi ikinnerussuteqalissaguni Naalakkersuisut siulittaasuat oqariartuuteqareerpoq qinersititsinissaq suaarutiginiarlugu.

Siumut imminut sammivallaarsimasoq Múte Bourup Egede isumaqarpoq.

- Partiimi matoqqasumik siulersorneqarnera partiimut nunatsinnullu iluaqutaanngilaq. Inatsisartuni suleqatigiinniarnermut iluaqutaanngilaq, pisariaqartinneqarnerpaavorlu Nunatta siunissamut qanoq ingerlariaqqinnissaa, oqarpoq.

Aningaasanut inatsisissaq

Kim Kielsenimut tatiginninnginnermik taasisoqassanngikkaluarpat, Inatsisartuni ukiaanerani ataatsimiinneq aaqqiagiinngiffiussasoq Múte B. Egedemit naatsorsuutigineqarpoq.

- Aningaasanut inatsisissamut isumaqatiginninniarnissaq imaannaassanngitsoq naatsorsuutigaara. Isumaqatiginninniutaasussat amerlanavianngitsut Naalakkersuisunit oqaatigineqareerpoq.

Pisortat suliffeqarfiini aningaasartuutit ikilisarneqarnissaat Demokraatinit siunnersuutigineqareerpoq. Atuarfinnut, meeqqanut pisariaqartitsisunut utoqqarnullu atugarisat pitsanngorsarneqarnissaat anguniarneqareertillugu isumaqatiginninniarnissat oqitsuinnaanavianngillat.

- Mittarfissualiornissamut isumaqatiginninniarnertuut aningaasanut inatsip suliarineqarnera ingerlanneqassasoq ernumagaara. Atugarissaarnerup tungaatigut Naalakkersuisut aamma pilersaaruteqanngitsumik sipaarniuteqarniarlutik oqariartuuteqareerput, taamaattumik isumaqatiginninniarnissat imaannaanavianngitsut naatsorsuutigaara, oqarpoq.

Powered by Labrador CMS