Inatsisartut
Ukiaanerani politikkimi oqaluuserisassat aajuku
Septembarimit novembarimut politikerit aningaasaqarneq oqaluuserinerujussuussavaat
Inatsisartut septembarimi ataatsimiinneq ammarneqarpat oqaluuserisassat aamma sammisat suut suliarineqarnissaat saqqummiuppaat.
Politikerit tallimanngornermi septembarip 16-ani nalunaaqutaq 11.00 suliartussapput, Inatsisartunilu oqallinnerit novembarip 18-ani qimassinnaavaat.
Aningaasanik isumaqatiginninniarnerit aallartittut
Inatsisartunut ilaasortanit oqaluuserisassanngortitat 54-it akuerineqarput, Naalakkersuisuniilu ukiaanerani 2016-imi ataatsimiinnermi 28-it oqaluuserisassanngortinneqarput.
Ukiaanerani aningaasanut inatsimmut isumaqatigiinniarfiusarnera ileqquuvoq, tamatumalu naatsorsuutigisinnaavarput oqalliffimmi aningaasaqarneq pillugu akerleriiffiunissaa.
Aningaasanut inatsisissamut isumaqatigiinniarnerit maanna aallartilluareerput, tamanna Sermitsiaq.AG aggustip qulingani allaaseraa.
Atuaruk: Aningaasanut inatsisissatut siunnersuut ukiuni tallimani aatsaat sinneqartoortoq
Aningaasaqarnermut tunngatillugu nammineq pensiuunisiassanut ileqqaagaqartarnissaq, utoqqalinersiassat saniatigut pinngitsaaliissutaalissanersoq Naalakkersuisut siunnersuutaat annertuumik oqallisaassaaq.
Pensiuunisiat akileraaruserneqarnissaat
Inuit namminneq pensiuuneqartut ikisinermi tigusineriniluunniit akileraarusersorneqassanersut aamma aalajangiiffigineqassaaq. Naalakkersuisoqatigiit allannguinissamut siunnersuuteqarput, ikisinermi akitsuusiisoqartassasoq, taamaalilluni nunap karsianut naalagaaffiup karsianuunngitsoq akileraarutit pisalerniassammata.
Politikerit sapaatip-akunneranut tallimariarlutik nalunaaqutaq 10.00-mit nalunaaqutaq 14.00 tungaanut naapittassapput, sapaatip-akunneranullu apeqqarissaartarneq pingasunngornermi pisassaaq.
Siunnersuutit tamarmik maanna Inatsisartut nittartagaanni takuneqarsinnaapput.
Inatsisartut.gl-imi atuaruk: Oqaluuserisassat