Ukaleq World Cup-imi peqataarngaarpoq
Sisoraaserluni ooqattaarsartoq Ukaleq Slettemark World Cup-imi sprintimi ullumi tallimanngornermi unammeqataavoq.
Ukaleq Slettemark nunarsuarmi sisoraaserluni ooqattaasartut pitsaanerit akornanni maanna unammisalerpoq.
Østrigimi Hochfilzenimi World Cup-imi unammisitsisoqarmat sprintimi, tassa 7,5 kilometerimi, unammeqataavoq ullumi tallimanngornermi. Unammeqataasut 109-t akornanni 96-itut inissippoq.
Ajugaasumit minutsini pingasuni kingulliusoq
Hvideruslandimit Dzinara Alimbekava ajugaavoq, taassuma atorpai minutsit 20-t sekundillu aqqaneq marluk. Ukaleq Slettemark ajugaasumit minutsini pingasuni sekundinilu 38-ni kigaannerulluni apuuppoq.
Igeriarnermi siullermi Ukaleq Slettemark eqqoriakkani marluk iluatsinngitsoorpai, taamaasilluni eqqoriakkaminnik uniortut kaajallaasarfiat marloriarlugu kaajallallugu. Igeriarnermi tulliuttumi Ukaleq Slettemarkip eqqoriakkani tallimat tamaasa eqqorpai.
Nunarput nittarsaakkusuppaa
Ukaleq Slettemark 19-nik ukioqarpoq, Norgemi najugaqarluni, ukiullu marluk matuma siorna inuusuttuni nunarsuarmi pissartanngorluni.
World Cup-imut peqataannginnermini TV2-mut ilaatigut ima oqarpoq:
- World Cup-imi peqataasinnaalernera isumaqartorujusuuvoq. Kalaallit Nunaata nittarsaanneqarnissaa qilanaaraara, nunara sinnerlugu unammeqataanissara qilanaaraara