Ukaleq VM-imi ajugaanini pillugu: Nuannerluinnarpoq
Ukaleq Slettemark, ooqattaasarluni sisorarnermi nunarsuarmi pissartanngortup ajugaanini tupaallaatigaa.
Kalaallit Nunaata ooqattaasarluni sisorartartuni pitsaanerpaasa ilaat, Ukaleq Slettemark, inuusuttut sisorarlutik nunarsuarmi Slovakiami pissartanngorniunneranni ippassaq kuultinnappoq. Unamminermi 10 kilumiiterisut takissusilimmi, sisamariarluni ooqattaasarfissalimmi ajugaavoq, ooqattaasaramilu uniorani.
- Ingasalluinnarpoq. Ajugaalluni nuanneqaaq, illaatigaluni Sermitsiaq.AG-mut oqarpoq.
Ukaleq Slettemark 17-inik ukioqarpoq, inuusuttunilu unammersuartuni angajulliit ilaanniilluni. Inuusuttut 18-it ataallugit ukiullit inuusuttut unammersuarneranni peqataasarput.
- Nunarsuarmi pissartanngorniuttuni angajulliit ilaanniippunga. Tamanna isumaqarpoq ajugaanissannut periarfissaqarsimasunga, maniguulluni Sermitsiaq.AG-mut oqaluttuarpoq.
Akunnerni 600-ni sungiusarsimasoq
Nunarsuarmili pissartanngorami ukiui kisimik pissutaanngillat. Ukaleq Slettemark maanna Norgemi Norges Topidræts Gynmasiummimi, Geilomiittumi atuarpoq, ullullu tamaasa sungiusartarluni. Nammineq isumaqarpoq ukiup ataatsip ingerlanerani ikinnerpaamik akunnerni 600-ni sisorarsimalluni.
Ukaleq Slettemark oqaluttuarpoq 10 kilumiiterinik isorartutigisumik unamminerminni unammiffiusoq ingerlavigiuminarsimasoq. Qaqqajunnaq ataaseq qaqiuminaassimavoq, sinnerali manissuinnaalluni ingerlavissaalluarluni, nuannerlunilu.
Unamminermi pissutsit tamarmik ajunngivissimasut, Ukaleq Slettemark oqaluttuarpoq.
- Anoreqanngilaq, aputeqarluarluni sisoraatikkalu ajunngivillutik. Taakku tamaasa iluaqutigilluarpakka, VM-imi ajugaasoq unneqqarilluni oqaluttuarpoq.
Inuusuttut nunarsuarmi pissartanngorniunneranni Ukaleq 16-inik ukioqarluni, siorna 27-nngorpoq.
Ukioq mannalu nunarsuarmi pissartanngorami angusaa pitsanngoriarujussuarpoq.
Unamminissamut piareersarluarsimaneq ajugaanermik kinguneqartoq, isumaqarpoq.
- Unamminermi atugassarititaasut tigulluarneqartariaqarput. Ippassarlu uanga taamaasivunga, Ukaleq Slettemark erseqqissaavoq.
Kalaallit sisorartartuutaat sisorarnerup aallartinnerani ingerlalluarpoq, Norges Cup-imi siullermik ajugaagami, aappassaanilu tulliulluni apuulluni. Maannalu kuultinnakkami, cuppimi siuttuugallarpoq.
Unamminermut tullermut piareertoq
Eqqissisimaaginnassanngilarli.
Sisoraatini maanna perrassalereerpai unamminissamullu tullermut piareersalereerluni. Unammineq siulleq tallimanngorpat pissaaq, tassani sprintimik unammisoqassalluni. Inuusuttullu nunarsuarmi pissartanngorniunnerat naggaserlugu, sapaatiuppat malersuullutik unammissapput, tamarmik immikkut piffissami aalajangersimasumi aallartassallutik, sukkanniullutillu sivikinnerpaamik sisorarlutik ingerlaniutissallutik.