Ukaleq Tjekkiami sukataartoq
Ukaleq Slettemark VM-imi angusarissaarpoq.
Ukaleq sisamanngormat Tjekkeiami Nove Mestomi rulleskini VM-eqarnerani supersprintimut anngunniunnerup ingerlannissaanut pilersaarusiorluarsimavoq.
Peqataasut 48-t akornanni ataasiaannarluni uniorluni qaffasinnerpaat akornanniilerpoq kusanavissumillu normu 4-nngorluni.
Apuunneraniit nalunaaquttap-akunnera ataaseq affarlu qaangiummata ajugaaniutivinneq ingerlanneqarpoq, tamannalu piareersarfigeqqissaarsimanngilaa.
Taamaattumik aallartinneq paatsiveerusimaarfiuvoq, unammeqatigiinnulli uteqqilertorluni, ooqattaasarlunilu seqqoqattaarnerni siullerni pingasuni arfinileriarluni uniorluni. Taamaakkaluartoq Ukaleq Slettemark isumalluarsimavoq.
- Ooqattaasarnermi kingullermi isumatusaarsinnaasimanera naammagisimaartorujussuuaara, periagassat tamaasa eqqorakkit sukkasuumillu apuukkiartorlunga taamaalillungalu normu 18-itut inissillunga. Ataatsimut isigalugu unammeqataanerma pitsaanerpaartaannut ilaanngilaq, kisianni anngunniulluni unamminermi normu 4-tut inissinnera ajugaaniutivinnermi ooqattaasarnermut kingullermut immikkoortumullu kingullermut nassarpara.
Arfininngornermi qasusimalluni unammeqataasoq
Ukaleq Slettemark tallimanngornermi ullup qasuersaarfiusup kingorna arfininngornermi qasusimalluni aallarteqqipoq.
- Supersprintimi ullormi ataatsimi marloriarluni unamminernut peqataaneq takorloorsimasannik sakkortuneruvoq. Ullumi aallarnissaq sioqqullugu timikkut suli qasusorujussuuvunga.
Taamaakkaluartoq Ukaleq Slettemarkip unnammeqataanini naammagisimaarpaa.
- Marloriarluni ooqattaasarnerni periagassat tamaasa eqqorpakka normu 6-itullu inissillunga.
Taamaalilluni ooqattaasartartoq inuusuttoq naasunik akissarsisitsinermi aamma inissaqalerpoq, allaaserisap qulaani assimi takuneqarsinnaasutut.
Aqagu sapaammi malersuunneq jagtstart Ukaleq Slettemarkip peqataaffigisaanik ingerlanneqassaaq.