- Pisortatigoortunngorpoq! Aallakaatitassiap Korpset-ip immikkoortuisa arfinilissaanni peqataavunga! taamak tanngassimaarluni oqaluttuarpoq Ukaleq Slettemark Facebookimi quppernermini:

- Aallakaatitassiamut peqataassallunga angerpunga, ilikkagassakka atorsinnaaniassagakkit nammineq timersortartutut ingerlaqqinnissanni. Aallussilluarsinnaaninnut, tarnikkut qasujaassutsinnut, piffissamik atuilluarsinnaaninnut, eqqorluaasinnaassutsinnut, suleqateqarsinnaaninnut aammalu ilusilikkanik iliuuseqarluarsinnaaninnut sungiusaatigerusukkakku, piginnaasat tamakku sakkutuut sukumiisumik ilinniarsimasut qaffasissumillu timersortartut atorfissaqartitarivaat, Ukaleq aallakaatitassiamut peqataanissaminut akuersisimanerminut tunngavilersuivoq.

"Korpset" sunaava?

Korpset tassaavoq tv-kkut nangeqattaartuliaq, tassani danskit tusaamasat sakkutuut qaffasinnerpaamik ilinniartitaasarnerannut (jægerkorpset) assingusumik misilittaatinneqartarput, tassani misilerarneqartarput sakkutuussatut tiguneqarnissamik misilinneqarnermi - timikkut tarnikkullu - misilerarneqartarnerminni aqqusaartagaat misilerarneqartarput, danskillu sakkutuui taakku nunarsuarmi sakkortunerpaamik ilinniartinneqartarnermikkut tusaamasaassutigaat.

Aallakaatitassiat nangeqattaartussiat arfinilissaanni danskit inuusuttut 14-it (Ukaleq kalaallinit, danskinit norskinillu kingoqqisuuvoq) imminnut naapipput misigisassat siumoortumik ilisimanngisat, imminut aqussinnaanermik misilinneqaatit naalliunnerlu aqqusaarneqartarput, aallakaatitassiat pingasunngornermi septemberip arfernganni TV2-playimi aammalu pingasunngornermi 13. septemberimi TV2 Echo-mi isiginnaarneqarsinnaalissapput.

Sakkutuutut jægerkorpset aqqutigalugu immikkut ilinniarsimasut Thomas Rathsack, Erik B. Jørgensen aamma Rune Danielsen, kiisalu aqqartartutut sakkutuujusimasoq Rune Viborg inuusuttut piginnaasaannik misileraasitsinermi aqutsisuupput.

Ukaleq Slettemarkip Facebookimini aallakaatitassiamut takoqqusaarusiaq ikkutaa uani takujuk: