Ukaleq Slettemark ooqattaasaatigaluni rulleskimi VM-imut peqataassasoq

Ukaleq Slettemark ooqattaasaatigaluni rulleskimi nunarsuarmi pissartanngorniunnermut siullermeerluni peqataalerpoq, Tjekkiami unammersuartorqarnerani inuusuttut unammeqatigissavai.

Unammineq siulleq ullumi sisamanngornermi ingerlanneqassaaq, tassani ”supersprint”-imik taaneqartartoq banemi naatsumi sisamariarluni ooqattaasarfiusussaq ingerlanneqassalluni. Siullermik aallarniutitut unammisoqassaaq, tamatumalu kingorna ataatsikkut allarluni ajugaaniutivittoqassalluni.

Ukaleq nummer 35-imik normoqassaaq, nunatsinnilu nalunaaqutaq malillugu 09.13 aallassalluni. Unamminerit tamarmik www.biathlonresults.com aqqutigalugu ”toqqaannartumik” malinnaaffigineqarsinnaapput.

Ukaleq Slettemark unammersuartoqarnissaanut Kalaallit Nunaanni sungiusarsimavoq.

- Qaammat kingulleq Nuummiippunga. Sungiusarnera ajunngeqaaq, unamminissanulli ukununnga Nuummi aalajangersimasunik sungiusarfissaqanngilaq, taanna oqaluttuarpoq.

Banemi aalajangersimasumi sungiusarneqartussaasoq

Ooqattaasarluni rulleskimik ingerlatsinissaq rulleskeertarfinni aamma ooqattaasarfiusinnaasuni sungiusarneqartussaavoq.

- Taamaammat nunarsuarmi pissartanngorniunnissamut matumunnga ajugaassangatinneqanngitsutut peqataasussaavunga. Nunarsuarmi pissartanngorniunnermut peqataaniarninni anguniagarivara, qaammatini sisamani kingullerni sungiusarluarsimanerlunga paasissallugu, nunarsuarmi pissartanngorniunnermut peqataasoq oqarpoq.

Ukale Slettemark qaammatini kingullermi timikkut ooqattaasarnikkullu pitsaasunik suliassaqarluarsimavoq, neriuutigaalu tamanna kinguneqarluarumaartoq.

- Ooqattaariaasera aallaasigalugu sungiusarluarsimavakka, inuussutissarsiutigalugulu ooqattaasartumit soorunami aamma Norgemi U-23-mi nunanut allanut unammisarninni sungiusaasunnit ikiorneqarsimanera iluaqutigisimaqaakka.

- Nunarsuarmi pissartanngorniuteqataanissara, minnerunngitsumillu pissanganerup adrenalillu taamatut unammersuartoqarnerani malugineqartuaannartut misigisaqarfiginissai qilanaarilluinnarpakka, taanna naggasiivoq.

Arfininngorpat marloriarluni ooqattaasarsiusumik 7,5 kilometerit unammiffigineqassapput, sapaatiuppallu sisamariarluni ooqattaasarfiusumik malersuulluni unammisoqassaaq.

Powered by Labrador CMS