Ukaleq Slettemark bronzinnannisamut 9 sekundinik kingusinaartoq
16-nik ukiulik Ukaleq Slettemark inuusuttut ooqattaasarlutik sapaatiummat VM-erneranni ajugaasut sisamaattut inissippoq
Ukaleq Slettemark tallimanngormat ooqattaasarluni ujakkaartarnermini aatsaat taama arpalluartigaaq, tassani inuusuttut Estlandimi VM-erneranni ajugaasut qulingattut inissippoq.
Unamminermi peqataasut 91-iupput, Ukaleq Slettemarkilu svenskimit ajugaasumit 20-nik ukiulimmit Elvira Øbergimit 48 sekundiinnarnik kingulliuvoq.
- Ukaleq Slettemark ukioqatimini sukkanerpaavoq. Ukiuni marluni tulliuttuni inuusuttunut suli peqataasarnissaanut isumalluarnarpoq. Ujakkaarluni ingerlanerup piffissalersorneqarnerani Ukaleq sukkanerpaasumit 35 sekundiinnarnik kigaanneruvoq, tassanilu pitsaanerpaat aqqanillit akornanni inissippoq. Qummukajaani takisuuni Ukaleq piffissamik annaasaqarpoq, kisianni sinnerini sukkanerusumik ingerlalluni, Nunatsinni ooqattaasartartut kattuffiat tusagassiuutinut nalunaarummi allappoq.
Ukaleq Slettemark tallimanngornermi ajugaasumit 48 sekundinik kingulliulluni sapaatiummat unamminermi aallarpoq. Tassani 7,5 kilometerimut arpappoq. Tassanilu ujaminnannissaminit 9 sekundinik kigaappallaalaarpoq, tassami ajugaasut sisamaattut inissikkami.