ujakkaaneq
Ukaleq Slettemark ajugaaqqittoq
Inuusuttoq ujakkaartartoq piukkunnaateqarluartoq Norgescupimi unammiuaarnermi ooqattaasarluni arpannermi ajugaavoq
16-iinnarnik ukiulik Ukaleq Slettemark 2018 aallartilluarpaa. Norgescupimi ooqattaasarluni ujakkaarnermi unammiuaarnermi K-17-it unammineranni arfininngormat ajugaavoq, tassani 10 kilometerinut sisamanik eqqarnertalimmik arpappoq.
Norgescupip Norgemi ujakkaarlutik ooqattaasartartut juniorit pikkorinnerpaat katersortarpai. Norgemi niviarsiaqqat K-17-it pikkorinnerpaat 49-t Ukalip unammivai.
Ukaleq sukkanerpaavoq, 20-eriarlunilu iginnermini pingasuinnaat uniorpai. Ukaleq arpannermini minutsit 39.09 atorpai, tullerminiillu minitsunik marlunnik sekundinillu 16-inik siulliuvoq, juniorinilu tamanna ajugaanerit annersaraat. 18-19-nik ukiullit arpannerini ajugaasut sismaattut inississinnaagaluarluni.
Taanna sapaammi arpalluaqqippoq, ujakkaarnermilu (6 kilometerinut marlunnik iginnertalimmi) nikorfalluni ataasiaannaq uniorluni ajugaasup tulliatut inissippoq.
Ukaleq Nuummi NSP-mi ujakkaarnermik sungiusarnikuuvoq, ooqattaasarlunilu ujakkaartarusulluni. Nuummi Arctic Winter Gamesimi biathlonimi pingasoriarluni kuultinnarpoq. Ajoraluartumik ooqattaasartarfik AWG-ertoqarnerani kisimi atatinneqarpoq, taamaattumillu ukiuni marlunni kingullerni iluamik sungiusarsimasinnaanngilaq.
Tamanna Ukaleq Slettemarkip Norgemut nuunneranut pisooqataavoq, maanna Norgep Toppidretts Gymnas (NTG)-imi Geilomi ilinniarnertuunngorniarpoq.