Ukaleq OL-imut peqataanissamut anngutiliivissoq
Sisoraaserluni ooqattaasartartoq Ukaleq Slettemark OL-imut anngunniunnermini naggammik unammeqataaqqammerpoq. OL-imut peqataanissamut akuerineqarnissaa tullinnguuppoq.
20-nik ukiulik Ukaleq Slettemark OL-imut peqataanissaa ilimanarsilluinnarpoq. OL Kina-mi Beijingimi februaarip sisamaanit ingerlanneqassaaq.
- OL-imut peqataanissara ilimanarsilluinnarpoq, unammeqataareernermini Sermitsiaq.AG-mut allappoq.
Qanoq misigisimanersoq aperineqarami ima akivoq:
- Qilanaartorujussuuvunga.
Unammisani ajugaaffigai
Ullumi tallimanngornermi unamminermi 28-attut inissippoq. Ajugaasumit Frankrigimeersumit Camille Bened-imit minutsimik ataatsimik sekundinillu 34-nik kigaannerulluni apuulluni.
Unamminermi OL-imut anngunniunnermi unammisani ajugaaffigai.
Toqqarneqarnissaa amigaataavoq
Taamaattoq suli pisortatigoortumik OL-eqataasussatut toqqarneqanngilaq. Sisoraaserluni ooqattaasartartut kattuffiata IBU-p peqataasussat avammut nalunaarutigeqqaassavai. Taanna sapaatiuppat pissaaq. Tullissaattut den danske olympiske komité-p aamma OL-eqataasussatut toqqartussaavaa.
Taamaattumik Ukaleq Slettemarkip OL-imut peqataanissaa ilimanarluarpoq, taamaattoq suli pisortatigoortumik nalunaarutigineqanngilaq.