Ukaleq nuakkami unamminissaminik taamaatitsisoq
Ukaleq Slettemarkip sapaatip-akunnerata siuliani wold cupimi unammeqataanera ukioq manna unammiuaartunut ilaanerata kingullersarigunarpaa. Ukiumi nutaami OL-ip ingerlanneqarnissaata tungaanut unammiuaarnissat sisamat maanna peqataaffiginiarlugit siunniuppaa.
Wold Cup ukioq manna siulleq tallimanngornermi Østrigimi ingerlanneqarmat normu 94-iulluni apuuppoq, sisoraaserluni ooqattaarisartoq taamaalilluni malersuulluni unammiuarnermi ingerlaqqinngitsoorpoq.
Ujakkaarluni sisorartartoq unammiuaartoqareersoq nuffasersimavoq, taamaammallu inuusuttut unamminissaanut peqataaniarani, inuusuttut sapaatip-akunnerani matumani Italiami unammiuaarnerannut peqataasussaagaluarami, Kalaallit Nunaanni Sisoraaserluni ooqattaarisartut kattuffiat ilisimatitsivoq.
Kattuffimmit oqaluttuarineqarpoq, ukiuunerani OL-imut Beijingimi 2022-mi februaarimi ingerlanneqartussamut anngunniuttut akornanni inissisimalluartoq.
- Agguaqatigiissillugit 61,68-inik angusaqartarpoq, taamaalillunilu OL-imut peqataanissamut immikkut akuersissutinik angusaqarniuttut akornanni normu 7-itut inissisimagallarluni. Sverigemi Norgemilu IBU cup ingerlanneqarmat angusaqarluarsimavoq, taakkunani unammiuaartoqarmat normu 7-itut 14-itullu inissikkami angusani 30 pointit missaannik pitsaanerulersippai, kattuffik nalunaaruteqarluni ilisimatitsivoq.
Slovakiami sisamariarluni unammeqataassasoq
Ukiuunerani OL-imut anngunniuttuni qulit angusaqarluarnerpaasimasut peqataanissamut immikkut akuersissummik tunineqartussaapput.
Anngunniunnerli suli ingerlavoq, januaarimmi qaammataata qiteqqunnera tikillugu pointinik suli katersisoqarsinnaavoq, tassa Ukaleq Slettemarkip inissisimaneranit ajornerusumik inissisimasut pointinnalluarnermikkut suli qaangersinnaavaat.
Sisoraaserluni ooqattaarisartoq taamaammat ukiortaareerpat Slovakiami unammiuaarnernut sisamanut peqataasussaavoq, naak OL-imut anngunnissaq ajornanngippassinnerungaluartoq.
Sisoraaserluni ooqattaarisartoq Italiamiittumi Livigno-mi juullisiorlunilu ukiortaarsiorniarpoq, tassani ukiuunerani OL-imi unammiuaarnissamut kingusinnerusukkullu USA-mi martsip qaammataani Utah-mi inuusuttut nunarsuarmi pissartanngorniunnissaannut 1700 meterisut qutsitsigisumi silaannaq sungiusarniarlugu.