Ukaleq norskit nunanut allanut unammisartuinut isumaqatigiissuteqarpoq

Sisorarluni ooqattaasartartoq Ukaleq Slettemark norskit nunanut allanut unammisartui U23-it sungiusaqatigisalissavai. Sulili Kalaallit Nunaat sinnerlugu unammisassaaq

Grønlands Biathlon Forbund-ip Norgemi Skiskytterforbund-imik suleqateqalernera. Isumaqatigiissutip imarivaa ooqattaajutigaluni ujakkaarluni peqataasartup Ukaleq Slettemark-ip ukiumi sisorarfiusumi 2020/2021-imi Norgip U23 Landsholdiani tamakkiisumik ilaasutut inissisimalernissaa.

Elite Sport Greenland tusagassiutinut nalunaarummi allappoq.

- Taamatut pisoqarneratigut Ukalip sungiusaasorilissavaa Norgemi U23-ni nunanut allanut unammisartut sungiusaasua Halvor Jørstad. Taamatullu iliornikkut Ukaleq landsholdini sungiusarnerit katersuuttarnerillu tamaasa peqataaffigisalissavai. Kiisalu tamakkiisumik peqataasutut landsholdimi nakorsat fysioterapeutit aamma atorsinnaalissallugit, nalunaarutigineqarpoq.

Pikkorilluinnartoq

Ukiumi unammiffiunerani Ukaleq norskit landsolditut IBU-cupinut, Junior VM aamma EM-inut angalanerni tamani angalaqataasalissaaq. Angalanernilu landsholdinut sullissisut ikiortaasullu tamaasa allatulli tunuliaqutigilissallugit. Kiisalu isumaqatigiissummi ilaavoq, Kalaallit Nunaata Junior VM aamma EM-ernerni norskit sullissisuinik ikiortaanillu atuisinnaasalernissaa.

- Ukaleq pikkorilluinnartuuvoq qaffasissunik angusaqarsinnaassuseqartoq taamaattumillu pingaartuuvoq Grønlands Biathlon Forbundip isumaqatigiissuteqarnerani uagut tapersersuinissarput, angujumallugu sapinngisaq tamaat Ukaleq-p pitsaanerpaanik pitsaassuseqalernissaa. Ukaleq angusaqarusussuseqarluni sulivoq ineriartortuarnissamut pitsaaninngorsartuarnissamullu piumassuseqarlunilu tarnimigut eqqarsartaatsimigullu nukittuvoq. Taamaattumik isumaqatigiissuteqarneq nuannaarutigeqaarput peqataaffigisinnaagatsigu, tamanna aqqutigalugu Ukaleq nunarsuarmi timersuutimini pikkorinnerpaat akornanni sungiusarsinnaanngorpoq, Elite Sport Greenlandimi siulersuisunut siulittaasuusoq Nikolaj Christoffersen oqarpoq.

Lillehammerimut nuussaaq

Norges Skiskytterforbundi aamma iluarisimaarinnilluni nalunaaruteqarsimavoq, taamatut iliornikkut ilagilissagamikku timersortartoq Norgip landsholdiani pikkorinnerpaatulli piginnaaneqartigisoq. Ukalermi sungiusarnerni ataatsimoornernilu pitsaasumik tunniussassaqarpoq minnerunngitsumik igeriallaqqissutsip nakissutsillu tungaatigut.

- Ukaleq Slettemark isumaqatigiissuteqarnermik naammagisimaarinneqaaq, oqarluni pisoq imminut pitsaanerpaasuusoq. Isumaqatigiissuteqarneq peqqutigalugu Ukaleq Geilo-mit Lillehammerimut nuuttussaassaaq Geilomi ilinniarnertuunngorniarfimmi Norges Toppidrettsgymnasiami 3.G-mi massakkut atuarfigisaminit. Norskimmi nunanut allanut unammisartui Lillehammer-imi aaliangersimasumik sungiusartarfigalugulu najugaqarfigerrappaat.

Powered by Labrador CMS