20-nik Ukaleq Slettemark Slovakiami Brezno-Osrbliemi 12,5 kilometerisut isorartussusilimmi ullumi unammeqataasussaagaluarpoq.

Napparsimalersimaninili pissutigalugu unammeqataanissani taamaatiinnarpaa.

- Anersaartorniarnera uuminarmat quersorlungalu unammeqataanissannut taamaatiinnarpunga. Napparsimanera ajornerulersikkumanagu, sivisunerusumillu napparsimannginniassagama taamaatiinnarpunga, Ukaleq Slettemark Sermitsiaq.AG-mut oqarpoq.

Tallimanngorpat unammineq kingulleq

Naatsumut tallimanngorpat unammeqataasinnaanissani neriuutigaa.

- OL-imut anngunniunninnut pointinnassutigisussaavara tallimanngorpat peqataanera. Uanninngaanniit kingulliullutik inissisimasut tikissinnaarpianngilaannga, oqarpoq. Tallimanngorpat naatsumut unamminermi OL-imut anngunniunnermi kingulliussaaq.

Ilisimasalik: Anngunnissaa ilimanarluarpoq

TV2 Sportenip sisoraaserluni ooqattaasarnermut ujakkaarnermillu ilisimasalittut oqaaseqartartuata, Kristian Bonne Wulffip, OL-imut anngunniunnermi Ukaleq Slettemarkip qulingiluaattut inissisimanera Facebookikkut nassuiartareerpaa. Inissani aqqaneq marluusuni tassa qulingiluaattut inissisimavoq.

Ukaleq Slettemarkip OL-eqataanissaa ilimagilluarpaa.

- 12,5 kilometerimut peqataasinnaannginnera soorunami uggornarpoq, tassanimi takutitsilluarnerpaasinnaagaluarpoq. Taamaattoq OL-imut anngunnissaa ilimanarluarpoq, tassami kingulliullutik inissisimasut naatsorsuutigineqanngitsumik angusarissaarluartussaapput Ukaleq Slettemark qaangissagunikku. Ukaleq Slettemark OL-eqataanissaminut inissisimalluarpoq, Kristian Bonne Wulff oqarpoq.

OL takorluulereersinnaavaa

Ukaleq Slettemarkip OL-eqataanissaa ilimanarluarmat peqataanissani takorluulereersinnaagaa oqaatigaa. OL Kinami Beijingimi februaarip sisamaanit ingerlanneqassaaq.

- Peqqissilluarniartariaqarpoq kiisalu OL-eqataannginnermini qatsissumi sungiusarluartariaqarpoq, Kristian Bonne Wulff oqarpoq.

Kristian Bonne Wulffip Facebookimi nassuiaataa uani danskisut allaqqasumi atuarneqarsinnaavoq: