Ukaleq napparsimagami VM-imut ilaajunnaarpoq
Ukaleq Slettemark Østrigimi sisoraaserluni ooqattaasarnermi nunarsuarmi pissartanngorniunnermi toqqusaarlulersimagami ilaajunnaarpoq.
Kalaaleq sisoraaserluni ooqattaasartartoq sapaatip akunnerata naanerani Obertilliachimi 12,5 kilometerimik isorartutigisumi oqilaniunnermi angusarissaarluni normut 8-tut inississimasoq, ukioq manna nunarsuarmi pissartanngorniunnermi peqataajunnaarpoq.
Ukaleq Slettemark ullaaq manna iterami toqqusaarlulersimavoq, taamalu marlunngornermi oqilaniunnissamut aqangulu pingasunngornermi ataasiakkaarlutik unamminissamut ilaasinnaajunnaarluni, Nunatsinni sisoraaserlutik ooqattaasartartut kattuffiat tusagassiorfinnut nalunaaruteqarluni ilisimatitsivoq.
Unammiffiusussat
IBU Cup sapaatip akunnerata tulliani ingerlanneqassaaq, apeqquterujussuuvorlu tassani unammeqataasinnaanersoq imaluunniit Norgemut angerlassanersoq.
- Peqqississaguni Sverigemiittumi Østersundimi Wold Cupimi peqataanissaminut periarfissaqarpoq, tassa siusinnerusukkut angusarisimasani tunngavigalugit peqataanissamut immikkut akuersissummik tunineqarsimagami, Nunatsinni sisoraaserlutik ooqattaasartartut kattuffiat ilisimatitsivoq.