Ukaleq angusarissaareerluni OL-imut anngunnissani qanilliartorpaa
Sisoraaserluni ooqattaasartartoq Ukaleq Slettemark pingasoriarluni unammeqataavoq sapaatip akunnerani siuliani. Pingasoriarluni unammeqataanermini marloriarluni OL-eqataanissamut piumasaqaatit anguai.
Ukaleq Slettemarkip OL-imut anngunnissani qanilliartorpaa.
Sverigemi Idre-mi unammeqataanermini marloriarluni angusarissaarluarpoq.
Unamminermi siullermi sprintimi, 7,5 kilometerisut isorartutigisumi, 116-it peqataaffigisaanni 46-tut inissippoq. Taamatut angusaqarnermini 89,14-nik pointinnappoq. Pointit annikinnerpaaffianiitinniartartussavai Beijingimi februaarip sisamaani peqataaniaruni.
Aatsaat taama angusarissaartigisoq
Sprintimi unammeqataaqqippoq arfininngormat.
- Inersimasut akornanni unammeqataasaleramili aatsaat taama angusarissaartigaaq. Tassani arfineq aappaattut inissippoq, ajugaasumit tysklandimeersumit 43,3 sekundiinnarnik arriinnerulluni, kattuffik allappoq.
Uniinnartariaqarsimasoq
Ataasiakkaarluni unamminermi sapaatiummat aamma peqataaqqippoq.
- Unamminermi tassani IBU-mit pointinnattoqarneq ajorpoq. Juullinnginnerani arlaleriarluni unammeqataasussaavoq, taamaattumik sukataarpallaarnani kiisalu igeriaqattaarluarnissani eqqarsaatigalugit unammeqataalluni. Unamminermi uniinnartariaqarsimavoq, ilisimatitsissutigineqarpoq.
OL-imut peqataanissani anguniagaraa. Inuusuttut VM-ernissaat aamma siunnerfigaa, taanna USA-mi aappaagu ingerlanneqassaaq.