Ujarneqalersut: Qallunaatsiaat ilerri attorneqarsimanngitsut
Juulip qiteqqunnerani itsarnisarsiuut Igalikup eqqaani biskoppeqarfimmi Gardarimi qallunaatsiaat iliveqarfiat nutaamik misissuiffigissavaat, ilivernik attorneqarsimanngitsunik ujarlerlutik. Saarngit attorneqarsimanngitsut innarlerneqarsimanngitsullu arlalissuarnik misissuiffigineqarsinnaapput, taamalu qallunaatsiaat pillugit paasisanik nutaanik takutitsisinnaallutik.
Kujataani Igalikup Kangerluata qinnguaniippoq qallunaatsiaat biskoppeqarfiata Gardarip sinnikui. Tassaniippoq vikingeqarallarmalli Qallunaatsiaqarfimmi kujallermi naasorissaasoqarfiit annersaat, ukiorlu 1124 missaani tassani biskoppeqarfimmik pilersitsisoqarpoq, nunatsinnilu biskoppit siullersaat Arnaldur tassunga nunassippoq, aviisi AG allappoq.
Biskoppeqarfik 1378-ip tungaanut atuuppoq, ukioq taanna biskoppi kingulleq Alf toqummat. Ukiut untritilikkaat taakkua akornanni qallunaatsiaarpassuit Gardarimi ilineqartarput. Oqaluffimmi sulisut, ilaqutariillu pisuut amerlanngitsut domkirkep iluani ilineqartarsimapput, amerlanersaalli eqqaani iliveqarfimmi ilinneqartarsimallutik.
Iliveqarfiup ukiuni 250-ini atuunnerani inuit tassunga ilineqarsimasut 2.000-it missaanniittut ilaat assallugit tamakkua saarngi attorneqarsimanngitsut, itsarnisarsiuut pinngortitalerisullu qallunaatsiaat oqaluttuarisaanerannik paasisaqarfigisinnaavaat.
Apeqqutit akissutissarsiukkat
Qallunaatsiaat kikkuuppat? Sunik nappaateqartarsimapput, sunillu nerisaqartarsimappat? Vikingeqarnerup ukiullu akulliit atuunneranni inuunerissaarsimappat imaluunniit perlinngujoorlutik inuusimappat? Qallunaatsiaqarfinni anginngitsuni inooqatigiinnikkut nikingassuteqartorujussuusimava? Pisuut piitsullu nikingassuteqartorujussuullutik, tamannalu piffissap ingerlanerani annertusiartorsimava?
Apeqqutit tamakkua piffissap ingerlanerani ilisimatuut akissutissarsiortareersimavaat, akissutissarsilaartarsimallugillu.
Allaaserisaq tamaat uani AG-mi aviisi pisiarineratigut atuarsinnaavat: