Ujarassiorneq
Ujarassiornermut ilitsersuut saqqummingajalerpoq
Innuttaasut, atuarfeqarfiit aamma takornarissat ujaqqat suut aqqusaarneqartarnersut atuakkat ilitsersuutit atorlugit pinngortitami angalaartalissapput.
Aatsitassanut Ikummatissanullu Naalakkersuisoqarfimmi Ujarassiornermut Immikkoortortaqarfik Kalaallit Nunaanni illoqarfinnut arlalinnut atuakkanik ujarassiornermi ilitsersuutinik suliaqarluni aallarteruttorpoq, tusagassiuutinut nalunaarummi paasissutissiisoqarpoq.
Piffimmi sulinerit
Ukioq manna piffimmi sulinerit Qeqertarsuup Tunuani Ilulissani ulloq 28. juli aallartinneqarput, tassanngaanniillu Oqaatsunut, Nuussuarmut, Uummannamut, Qasigiannguanut Qeqertarsuarmut Aasiaallu eqqaanut ingerlaqqittoqassalluni. Inuit sisamat angalaqataassapput: ujarassiuut pingasut assiliisartorlu ataaseq.
Atuakkat ilitsersuutit umiatsiamit orninneqarsinnaasuni piffinni sinerissamut qanittumiittunik kiisalu illoqarfimmit nunaqarfimmillu qanittuni pisuinnarmik orninneqarsinnaasunit aallaaveqassapput. Atuartartup atuagaq ilitsersuut atorlugu piffimmi ujaqqanik paasisaqarlunilu kiisalu ulluinnarni pinngortitami avatangiisitsinni ujaqqanut tunngasunik oqaatsit/taaguutit paasisaqarfigissagai eqqarsaataavoq.
Tamanut iluaqutissaq
- Aatsitassaatigut tamatsinnut iluaqutaassapput, taamaattumillu uannut pingaaruteqarpoq annertunerusumik aatitassaatigut pillugit piffinni atorneqarsinnaasunik ilisimasanik pilersitsinissarput. Piffinni ilisimasat atorlugit ass. nunaqavissut annikitsumik aatsitassarsiorsinnaanerat imaluunniit takornariaqarnermi ujarassiornermut sammisumik aallartisaasinnaanerannut periarfissaat pitsanngorsarneqarsinnaapput. Taamaattumik atuakkat ilitsersuutit nunaqavissut amerlanerit ataatsimoorluta pisuussutitsinnut atorluaanerusinnaanissaannut tapertaassapput, Aatsitassanut Ikummatissanullu Naalakersuisoq, Múte Bourup Egede oqarpoq.