Ujarassiorit 120.000 koruuninik aningaasartaqartoq aallartippoq
Ujarassiorumatuut ukiumoortumik unamminerat aallartippoq.
Akissarsiassat akileraarutitaqanngitsut katillutik 120.000 kroniupput, taakkunanngalu ajugaasup 55.000 kr. pissarsiassarai, Aatsitassanut Naalakkersuisoqarfik ilisimatitsivoq.
Ujarassiorit 1989-imili unammissutigineqartalerami ujarassiornermik soqutigisaqartunit nuannarineqarluarpoq, aningaasallu pinnatassiissutigineqartartut aningaasaateqarfinnit suliffeqarfinniillu arlalinnit tunniunneqartarlutik. Grønlandsbankenip Inuussutissarsiornermi aningaasaateqarfia aningaasaliisunit annersaavoq, 40.000 koruuninik tapiigami.
Paasissutissat amerlanerit
Nittartakkami www.ujarassiorit.gl-imi ujarassiornermut peqataanermut paasissutissat saniatigut quppersakkat saqqummersitallu allat ujarassiornermi iluaqutaasinnaasut aamma aaneqarsinnaapput. Assersuutigalugu atuagaq ”Mineralinik ilitsersuut – Ujarassiuujunngitsunut aatsitassarsiorneq” juulip qaammataani allakkerivinni tamani akeqanngitsumik pineqarsinnaalerumaarput.
Ukiormanna Ujarassiorimmut peqataasut nassaavi oktoberip aallaqqaataat 2019 nallertinnagu tiguneqareersimassapput.
Inuussutissarsiutiginagu ujarassiortut kisimik
- Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Ujaqqat nunatsinneersut kisimik nassiunneqarsinnaapput. Ujaqqat nassaariffii sukumiisumik aatsaat nalunaarutigineqarpata peqataasut akissarsitinneqarsinnaapput. Karseeqqami ataatsimi nassiunneqartumi taamaallaat ujarak ataaseq nassiunneqassaaq, anginerpaamillu assammit eqeruloorsimasumit anginerussanngilaq, qaarsumiillu ujarak sapinngisamik peerneqarsimassalluni. Ujaqqat nassiussat utertinneqarsinnaanngillat , naalakkersuisoqarfik tusagassiutinut nalunaarummini taama ilisimatitsivoq.