Ujakkaarnermi aaqqissuussaq nutaaq Lârsêraq Skifte-mut atsiunneqarsimasoq

Kalaallit Nunaanni Sisorartartut Kattuffiat aaqqissuussamik nutaamik ukiut tamaasa nunatsinni aaqqissuunneqartartussamik pilersitsisimavoq, tassani sungiusaqatigiittoqartassaaq aamma aaqqissuussaq Arctic Circle Racemik pilersitsisimasumut atsiunneqarsimavoq.

Aaqqissuussaq Lârsêraq Ski Festival-imik atserneqarsimavoq, siullermeersumillu Nuummi ulluni 10.-13. marts ingerlanneqassalluni.

Ujakkaartartut ataatsimiititaliaat tusagassiorfinnut nalunaaruteqarlutik allapput, ukiut tamaasa illoqarfik aaqqissuussiffigineqartoq allanngortassasoq, nunamilu ujakkaartartut klubbii tamarmik peqataasinnaasut:

- Ukioq manna pinnguarneq, sungiusarneq ataqatigiinnerlu sammineqarnerussapput. Nuannaarutigaarput Nuummi ujakkaartartut peqatigiiffiat NSP akuersisimammat uumap aaqqissuussap iluatsinnissaanik qulakkeerinnittumik, ujakkaartartut ataatsimiititaliaanni siulittaasoq Majaq Heilmann allappoq.

Sungiusaqatigeeqattaarnerit sammineqassapput aammalu unammisoqassalluni. Tamatuma saniatigut aamma nuna tamakkerlugu sungiusaasoq Martin Møller saqqummiissaaq oqallititsilluni una qulequtaralugu: ” Naleqartitat aammalu suut aqqutinni iluatsittariaqarpat”.

Pilerisunnerulertitsissasoq, ataqatigiinnerulersitsissalluni tamanullu peqataatitsissasoq

Aamma ujakkaarluni sisorartartoq ukiuuneranilu OL-imut peqataasimasoq Michael Binzer festivalimi peqataassaaq, tassani inersimasunik inuusuttunillu sungiusaassalluni.

Ujakkaartartut ataatsimiititaliaanit oqaluttuarineqarpoq, festivali Arctic Circle Racemik pilersitsisimasumut toqukkullu qimagussimasumut Lârsêraq Skifte-mut atsiunneqarsimasoq.

Festivali pilerisunnerulertitsissaaq, ataqatigiinnerulersitsissaaq, peqataatitsissaaq peqataasullu piginnaasaat ineriartortsinneqassapput, Ujakkaartartut ataatsimiititaliaannit oqaatigineqarpoq.

Powered by Labrador CMS