Ujaasinissaraluaq namminneq piumassutsiminnik ujaasisunit pinngitsoortinneqarsimasoq
Inuit marluk ippassaq unnulluinnartoq Kulusuup eqqaani qimusserlutik angerlanngitsoormata, politiit ujaasisoqarnissaanik aallartitsisimapput. Kulusummili namminneq piumassutsiminnik qatserisartut namminneerlutik ujaasilersimapput, ajunngitsumillu angusaqarlutik.
Angutit marluk Kulusuup kujataata tungaani qimussereerlutik pilersaarutaasutut arfernup eqqaani angerlamut apuutinngimmata ernumasoqalersimavoq, politiillu angutit taakku marluk nassaarineqarnissaat anguniarlugu ujaasisoqarnissaanik aallartitsisimallutik.
- Pineqartut marluk arfernup eqqaani angerlamut apuussimanngimmata, nalunaaruteqartoq qamuteralani atorlugu taakkuninnga ujaasiniarlui aalajangersimavoq. Qimmit qamutillu qimaannarneqarsimasut nassaarineqarnerisa saniatigut annanniut pullattagaq, pineqartut atorluartagaat Kilaarmijiit eqqaanni nunap qaavanittoq nassaarineqarmat ernumasoqangaatsialersimavoq, Nuummi Politiini pigaartut pisortaat Malik Sandgreen Sermitsiaq.AG-mut oqaluttuarpoq.
Tamanna tunngavigalugu poliitit ujaasisoqassasoq aalajangersimapput, aamma qulimiguulimmik sumiiffiup eqqaani ujassititsinissaq periarfissaanersoq misissorneqarsimavoq, silali pissutaalluni tamanna ajornarsimavoq.
Nal. 01.46 nassaarineqartut
Kulusummi namminneq piumassutsiminnik qatserisartut namminneq iliuuseqarniarlutik aalajangersimapput, qamuteralaallu atorlugit unnuap-qeqqata kingorna ujaasilersimallutik.
- Inuit marluk pineqartut illuaqqamiittut nalunaaqutaq 01.46 nassaarineqarput. Tamarmik ajunngillat. Nassaarineqartut aappaa – angut inuusuttoq – qamuteralammut ilaalluni Kulusummut angerlarsimavoq, aappaali – angut utoqqasaaq – illuaqqamiiginnarsimavoq ullumi qimusserluni angerlarniarluni, Malik Sandgreen ilisimatitsivoq.
Pigaartut pisortaata nuannaarutigaa, unnuap-qeqqata missaani ernumassuteqangaatsiarnerup tunngavissaqarsimannginnera, namminnerlu piumassutsiminnik qatserisartut ujaasinermikkut ikiuussimanerat nuannaarutigalugu.
- Ajorluinnartumik pisoqarsimasinnaasoq isumaqarsimavugut. Qujanartumilli tamarmik ajunngillat, pigaartut pisortaat erseqqissaavoq.