Skip to main content

Ujaasingaatsiarsimaneq ajunngitsumik inerneqartoq

Inuit marluk ujaarineqartut ajunngitsut nassaarineqarsimapput.

Politiit pingasunngornerup unnuaani inuit marluk ujaarineqarnerat aallartissimavaat. Inuit marluk taakku Aasiaannit Niaqornaarsummukarlutik ataasinngornermi aallarsimapput, taammaa Aasiaat nunaqarfiullu Niaqornaarsuit akornanni isorartoqisumi ujaasisoqarsimavoq.

Angutit marluk taakku 37-ik 18-inillu ukioqarput, ajunngitsulli nassaarineqarsimallutik, politiit ilisimatitsipput:

- Angutit taakku marluullutik ajunngitsut, qeqertap Akulliit eqqaanniittut pingasunngornermi ullup-qeqqat siornatigut aqqarnup missaani nassaarineqarput. Umiatsiaat kivisimavoq, nunamulli qaqisinnaasimallutik. Qeqertamiittut inuinnaap angallataanit, ujaasinermut peqataasimasumit nassaarineqarsimapput, Kalaallit Nunaanni Politiit.

Ujaasingaatsiartoqarsimasoq

Kalaallit Nunaanni Politiit pingasunngornermi ullaakkut ilisimatitsissutigaat, inuit marluk mobilelefoni atorlugu ilaquttaminnut sianersimasut oqaluttuaralugulu, umiatsiaminnik Aasianniit Niaqornaarsuup tungaanukarlutik motooriminnik ajornartorsiuteqaleramik, qeqertamut nalusaminnut niusimallutik.

Politiit taamaammat ujaasineq aallartissimavaat, tassani politiit angallataat Kimik Aasianniit ujaasiartortinneqarsimavoq, qulimiguullu ujaasinermi annaassiniarnermilu atorneqartartoq Ilulissaniit ujaasiartortinneqarsimalluni.

Taakkua saniatigut Issittumi Sakkutooqarfiup umiarsuaa alapernaarsuut Ejnar Mikkelsen ujaasiartortinneqarsimalluni, inuinnaallu arlallit namminneq kajumissusertik tunngavigalugu ujaaseqataasimallutik. 

Politiit naapertorlugit, angutit taakku marluk umiatsiaminni ajunaalernermi kalerrisaaruteqannginnerat, satellittelefoneqannginnerat VHF-milluunniit raadioqannginnerat pissutigalugit sumiissusersineqarsinnaasimanngillat. 

- Annanniarnissamut periarfissagissaarpallaarsimanngitsut

Politikommissærip Brian Thomsenip oqaatigaa, pisoq angutinut taakkununnga marlunnut ajorluinnartumik kinguneqarsinnaasimagaluartoq:

- Umiatsiami ammasumi ikiortissarsiornissamut periarfissaqaratik aallarsimapput. Ajornartorsiulernermi annanniarnissamut periarfissagissaarpallaarsimanngillat, qujanartumilli taamak ajortigisumik pisoqarsimanngilaq. Nassaarineqarnerat qujanarpoq, ajorluinnartumimmi pisoqarsinnaagaluarpoq, pigaartut pisortaat politikommissæri Brian Thomasen oqarpoq.

Politiit ujaasinermi peqataasimasunut tamanut qujassuteqarput:

- Qutsavigaavut Aasiaat Radioat, Qulimiguulik ujaaseqataasoq, Kalaallit Nunaanni Politiit namminneq angallataa Issittumilu Sakkutooqarfiup angallataa ujaasinermi pingaarutilinnik suleqataasimammata. Immikkut qujaffigerusuppavut inuinnaat namminneq kajumissusertik malillugu angutinik taakkunannga marlunnik ujaaseqataasimasut. Taakkumi ilaasaa ujaarineqartut nassaarisinnaasimavaat, Brian Thomsen oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER