Ujaasineq: Qulimiguulik S-61 ujaasilerpoq
Uummannap eqqaani Ukkusissat/Perliffiup kangerluani aalisartut maqaasineqartut marluk ujaarineqarnerat ullumi nanginneqarpoq
Marlunngormat sermip nakkaanneranut atatillugu aalisartut marluk maqaasineqartut annaassiniartartunit suli nassaarineqanngillat.
Umiatsiaararsorlutik aalisartut pingasut ilaat ataaseq marlunngormat nassaarineqartoq, uummamik aallartitsissut atorlugu uummassarneqaraluarpoq, inuunerali annaanneqarsinnaasimanngilaq.
Qulimiguulik S-61 ujaasitinneqalersoq
Qulimiguulik S-61 aalisartunik maqaasineqartunik marlunnik ullumi ujaasitinneqalerpoq, ujarneqartut isikkui imatut nassuiarneqarput:
Angut kalaaleq, 29-nik ukiulik, tungujortumik qalipaatilimmik atallaarsualik.
Angut kalaaleq, 51-inik ukiullik, qaatiguuata saava aappaluttumik qalipaatilik, tunualu tungujortumik qalipaatilik aamma tuii akimorlugit refleksitalik.
Politiit kaammattuutigaat sermeq nakkaaqqissinnaammat, taamalu tassaartitsilersinnaammat qanilleqassanngitsoq.