Ujaasillunilu annaassiniartarnermi teknologi nutaaq atorneqassanngitsoq

Kalaallit Nunaanni qulimiguullit nutaat, ujaaasillunilu annaassiniarnermut atorneqartussat assiliissutinik infrarødimik laseritalinnik qanittukkut atortulerneqarnissaat ilimananngilaq, tamanna illersornissamut ministerip Trine Bramsenip akissutaani atuarneqarsinnaavoq

Inuunermik annaassisoqassappat Kalaallit Nunaanni qulimiguullit annaassiniarnermut atorneqartartut qanoq atortorissaartiginerat apeqqutaavoq. Taamatut isumaqarpoq IA sinnerlugu folketingimi ilaasortaq Aaja Chemnitz Larsen.

Taassuma illersornissamut ministeri Trine Bramsen aperisimavaa, Kalaallit Nunaanni qulimiguullit annaassiniarnermut atorneqartartut assiliiissutinik infrarødimik laseritalinnik, nunami kissarnermik takunnissinnaasunik taamalu inunnik nunami ajornartorsiortunik ujaasinermi iluaqutaasinnaasunik atortulerneqarnissaat pilersaaruteqartoqarnersoq.

Trine Bramsenip akissuteqarnermi erseqqissaatigaa, annaassiniarnermi upalungaarsimaneq nutartigaq nukittoorlu pingaaruteqartoq. Maannakkuugallartorli naammagisimaarnerarpaa, ”Kalaallit Nunaanni annaassiniartartut piumasaqaatinik Skibsfartens og Luftfartens Redningsrådimit aalajangersarneqarsimasunik naammassinnissimanerat, tassunga ilanngullugu annaassinissamut 94 procentit piumasaqaataanerat sinnerlugu annaassisoqartarnera”.

Qulimiguullit piumasaqaatinik naammassinnittut

- Air Greenlandimik isumaqatigiissuteqarnermut atatillugu Illersornissaqarfimmit nalilerneqarsimavoq, Kalaallit Nunaanni qulimiguullit nunami upalungaarsimanermut atorneqarnissaannut Air Greenlandip neqeroorutigisimasai ujaasillunilu annaassiniarnissamut piumasaqaatinik naammassinnittuusut, Trine Bramsen allappoq.

Illersornissamulli ministerip FLIR-systemimik (Forward Looking Infrared System, red.) taaneqartartut atorneqalersinnaanerat itigartitsissutigivinngilaa, akissuteqarnerminilu imatut ilisimatitsilluni:

- Illersornissaqarfimmi aqutsisut piumaffigisimavakka, Kalaallit Nunaanni annaassiniartarnerup qanoq ingerlaneranik malinnaalluaqqullugit, tassunga ilanngullugu Forward Looking Infrared System (FLIR) pillugu qanoq isumaqarnersut aperisimallugit, aamma Kalaallit Nunaanni annaassiniartarneq pillugu Naalakkersuisut nammineerlunga oqaloqatigilluartarpakka.

Powered by Labrador CMS