Ujaarineqartoq: Angut 64-inik ukiulik Maniitsup eqqaani aalisariarsimasoq utersimanngilaq
Ujaarineqartoq umiatsiaaqqamik qaqortumik qalipaatilimmik quliliuttagaqartumik SUZUKI-millu aquuteralalimmik sisamanngornerup ullaavani aalisariarluni aallarsimavoq.
Angut 64-inik ukiulik Maniitsup eqqaanut aalisariarsimasoq, utersimanngitsorli oqartussat maanna ujaaraat. Angerlamut utersimanngimmat ilaqutaasut isumaalullutik nalunaarutigisimavaat.
Arktisk Kommando Facebookimini taama allappoq.
Kalaallit Nunaata Politiivisa ujaasineq aaallartissimavaat, Arktisk Kommandolu ujaasinermi ataqatigiissaarisuuvoq.
Illoqarfimmi politiit angut ujarpaat. Arktisk Kommandop nakkutilliissutaa Ejnar Mikkelsen illoqarfiup avannaa tungaani aamma ujaasitinneqarpoq.
Umiatsiaaraq qaqortumik quliliuttagalik
Sumiiffimmi sila ujaasinermi unammillertitsivoq. Arktisk Kommandoå Air Greenlandip qulimiguulia EC225 atorlugu ujaasititsisimagaluarpoq, sumiiffimmili putsermat isikkivilussimavoq.
Innuttaasut ujaasinermi ikiuussinnaasut kaammattorneqarput qinaaseqqullugit. Aasiaat Radiokkut ujaarineqartoq aamma nalunaarutigineqartarpoq, angallatit nakkutiginninnissaat anguniarlugu.
Ujaarineqartoq sisamanngornermi ullaakkut avalassimavoq. Qaqortumik qalipaatilimmik quliliuttagaqartumik umiatsiaaraqarpoq, Suzukimillu aquuteralaqarluni. Angut kisimiilluni aallarsimavoq. Aappaluttortalimmik qorsorpaluttortalimmillu kavaajaqarpoq, tungujortunik atasoqarluni gummissuaqarlunilu.
Pisumut tunngatillugu paasissutissaateqartut Kalaallit Nunaata Politiivinut 70 14 48-mut sianeqquneqarput.