Skip to main content

Uiverneq: Aningaasanut inatsisissatut siunnersuut ullut sisamat qaangiummata Naalakkersuisut atorunnaarsippaat

2019-mut aningaasanut inatsisissatut siunnersuut Naalakkersuisut sinnerlugit Aningaasaqarnermut Naalakkersuisup Pele Borberg-ip tamanut saqqummiussaa atorunnaarsinneqassasoq Naalakkersuisut aalajangersimapput.

 

Sermitsiaq.AG-mit paasivarput Inatsisartuni partiit ilisimatinneqarsimasut, aningaasanut inatsisissatut siunnersuut atorunnaarsinneqassasoq nutaamillu nutartikkamik saqqummiussisoqassasoq.

Nutartikkami mittarfissualiornernut pilersaarut peerneqarsimagaluartoq ilaatigut ilanngutsinneqassasoq Sermitsiaq.AG-mit paasivarput.

Ilisimatitsissut

Inatsisartut aningaasaqarnermut ataatsimiititaliaat ilisimatinneqarsimavoq aningaasanut inatsisissatut aningaasaqarnermut ataatsimiititaliaat siunnersuummik nutartikkamik ullumikkut tallimanngornermi nassinneqassasoq, maannamulli Naalakkersuisut suli tunniussaqanngitsut Sermtisiaq.AG-mit paasivarput.

- Assut tukattumik ingerlatsisoqarpoq taamaammallu aningaasanut inatsisissatut siunnersuut ataatsimut isigalugu oqaaseqarnissaq ajornakusoortorujussuuvoq. Aningaasaqarnermut ataatsimiititaliaq missingersuutit pillugit isumasioqatigeeqqammerpoq, ilaasortallu Nuup avataaneersut angerlamut aallaqqereernikuupput. Inatsisartut ataatsimiititaliaannut suleriaasiannullu ataqqisaatsuliorneruvoq annertooq taamatuttaaq inuiaqatigiinnut piffissaajaaneruvoq ullut sisamaannaat qaangiuttut siunnersuummik allamik saqqummiussoqarniarnera, IA-p siulittaasua aningaasaqarnermullu ataatsimiititaliamut siulittaasoq Sara Olsvig oqarpoq.

Piffissami matumani Naalakkersuisut, siulittaasortik Kim Kielsen siuttoralugu ataatsimiipput ulluni makkunani pisut uivernertut aallaaveqartut aammalu nalinginnaanngitsut tunngavigalugit.

Uiverneqarpoq

Kingullertigut aviisimi Sermitsiami ipassaq saqqummertumi Jens Napaattooq nalornilersitsivoq naalakkersuisooqatigiit siunissaat pillugu, taannami siulittaasuni tapersersortigalugu tunuartikkumanngilluinnakkaminnik piumasaqaateqaramik.

Jens Napaattooq piumasaqarpoq piniagassat avanersuarmi Tunumilu killilersugaajunnaassasut aammalu Upernavimmi tunitsiveqarnikkut ajornartorsiutit aaqqiivigineqassasut.

Kielsen unitsitsivoq

Taamatuttaaq maluginiarneqarpoq Aningaasaqarnermut Naalakkersuisoq Pele Broberg aningaasanut inatsisissatut siunnersuummik saqqummiussimmat Kim Kielsen tusagassiortunik katersortitsineq unitsitsinneqassasoq ussersorsimasoq, tamannalu pivoq Siumumi siuttuusimasup Lars Emil Johansen-ip isorinnilluni apeqquteqareersorlu. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER