Uani takuuk: Kalaallip naatsumik filmiliaa festivalimi nersornaaserneqartoq
Kalaallip 2018-imi naatsumik filmiliaa. 'Home', ukioq manna Kievimi juunip 26-ani 27-anilu Film Festivalertitsoqarnissaani pitsaanerpaamik assiliartaliisimasutut nersornaaserneqassaaq.
Ilulissat tungujualaartut, timmiaaraq uaneralaannguamiittoq aamma killingusaaq nunarsuup qaarajunneranik erseqqissumik takutitsisoq. Assit kusanarluinnartut ilagaat ilitsersuisup Inuk Jørgensenip naatsumik filmiliani 'Home'-mi takuneqarsinnaasut.
Filmi 2018-imi Nuuk International Film festivalimi takutinneqaqqaarmalli, nunarsuarmi tamarmi takutinneqartarsimavoq. Nunani allani maluginiarneqarluarsimavoq, aamma USA-mi, Europami Indiamilu festivalertitsisoqarneranni nersornaaserneqartarsimavoq.
Ukioq manna Kievimi Kortfilmfestivalertitsinermi nersornaaseqqinneqartussaavoq. Tamatumuuna Best Cinematography – pitsaanerpaamik assiliartaliisimanermut tunngatillugu.
- Naatsumik filmiliama ukiut marluk qaangiutilereeraluartut suli atorneqarsinnaanera nuannaarutigeqaara, soorunami aamma nersornaaserneqarneq qujamasuutigeqaara, Inuk Jørgensen oqarpoq.
Atortut akii pitsaassutsimut tamatigut aalajangiisuusanngitsut
Filmi, assiliiviit assigiinngitsunik pitsaassusillit arlallit atorlugit filmiliarineqarpoq, ilaatigut smartphone atorlugu - aamma pissutsit assigiinngitsupilussuit iluini, ilitsersuisoq oqaluttuarpoq.
- Tamatuma takutippaa, assiliiviup qanoq akeqarnera assit pitsaassusaannut tamatigut aalajangiisuusanngitsoq. Aaamma kalaallit oqaluttuaannik nunani tamalaani tarrarsorfineqarsinnaasunik takutitassiorneq tulluussimaarnaqaaq, Inuk Jørgensen oqarpoq.
Filmfestivalertitsinissaq corona pissutigalugu kinguartinneaqarsimavoq, digitalikkullu ingerlanneqassalluni.
Filmi uani takuuk: