Uanga nammineq toquinnarusullunga kissaatigissagaluarpara

Demokraatit siulittaasuata katsorsarneqarsinnaanngitsumik napparsimalissagaluaruni toqqagassaq qularutiginngilaa. Toquinnarusuttunut ikiuisarneq pillugu maanna Inatsisartuni oqallissaaruteqarpoq.

Jens-Frederik Nielsen: - Apeqqut uanga nammineerlunga eqqarsaatigisimaqaara, inuuninni ukiup sinnera siniffimmi nalallunga inuunermik naammassinninneq taamaattoq uanga kissaatiginngilara, asannitsimalu taamatut eqqaamassagaannga kissaatiginagu.

Inunnut katsorsarneqarsinnaanngitsumik napparsimasunut toquinnarusulluni ikiorneqarnissaq periarfissaassava?

Apeqqutit tamakku isumaqatigiinngissutaasartut ilagaat, Jens-Frederik Nielsenillu Demokraatineersup tamanna oqallisissiatut siunnersuutigaa. Taamaattumillu Inatsisartut tallimanngorpat upernaakkut ataatsimiinnerat aallartippat, oqaluuserisassat siulliit ilaattut apeqqut qaqissavaa.

Ikiorneqarsinnaajunnaarnertik pissutigalugu toquinnarusullutik kissaateqartunut ikiuineq inuunermik testamentitut isikkoqarsinnaavoq – peqqinnerup nalaani – ullut ilaanni nappaammik ikiorneqarsinnaanngitsumik napparsimalernermi qanoq paaqqutariniarneqarnerluni aalajangerneq.

Suna tamaat aqqusaarlugu ikiorserneqarniarpa? Ikiorneqarsinnaajunnaarnertik pissutigalugu toquinnarusulluni ikiorneqarniarpa? Taamatut pisunut aalajangeeqataalersinnaavoq. Soorlu ullumikkut timip pigisaanik tunniussisoqassatillugu aalajangertarneq assigalugu, Jens-Frederik Nielsen oqarpoq, inunnut katsorsarneqarsinnaanngitsumik napparsimasunut toquinnarusulluni ikiorneqarneq periarfissaassasoq, taanna nammineq isumaqarpoq.

Nalorninarnera oqaatigigaa

Toquinnarusulluni ikiorneqarnissamut pisinnaatitaaffeqarnissaq pillugu apeqqut arlalinnik nalorninartoqartoq, taassuma oqaatigaa. Kisiannili ikiorneqarsinnaajunnaarnertik pissutigalugu toquinnarusullutik kissaateqartunut ikiuineq inatsisiliortoqannginnerani inuiaqatigiit akunnerminni eqqartuinissaat pingaartippaa. Kiisalu peqqinnissaqarfimmi maanna pigisat atorlugit anniarnaveersaatinik suliniutit pitsanngorsarnissaannut periarfissat suunersut misissorlugit.

- Apeqqut uanga nammineerlunga eqqarsaatigisimaqaara, inuuninni ukiup sinnera siniffimmi nalallunga inuunermik naammassinninneq taamaattoq uanga kissaatiginngilara, asannitsimalu taamatut eqqaamassagaannga kissaatiginagu. Periarfissaasuuppallu ikiorneqarsinnaajunnaarnera pissutigalugu toquinnarusullunga kissaateqarninnut ikiuineq toqqassagaluarpara, Jens-Frederik Nielsen oqarpoq, allallu assigiinngitsunik isumaqarsinnaanerat ataqqinerarpaa.

Inatsisartut apeqqut 2018-imi oqallisigereerpaat. Tamanna ilisimasallit nalunaarusiaannik 2020-mi saqqummiussinerannik kinguneqarpoq, tassanilu katsorsarneqarsinnaanngitsumik napparsimasunut ataatsimut isigalugu anniarunnaarsaanermik suliniuteqarnissaq innersuussutigaat, toquinnarusuttunik ikiuineq pinnagu.

Powered by Labrador CMS