U19-mi futsalertartut: Kalaallit arsaalluaraluarlutik ajorsaqqittut
Futsalimi U19-mi nunanut allanut unammisartut pingasunngormat unammilluaraluaqaat. Unammineq naammassingajalersoq siuaqqagaluarput, misilittagakinnerli pissutaalluni Ungarnermiunut ajorsarlutik.
Kalaallit futsalimi U19-mi nunanut allanut unammisartut Kroatiami 'Futsal Week'-imi ulluni makkunani unammeqataapput.
Ukrainermiunut 1-10-mik marlunngormat ajorsarput, puljemilu unamminerat aappaat ingerlanneqarpoq pingasunngormat, tassani Ungarn unammillugit.
Unamminermi immikkoortumi siullermi unammisut naligiiginnarput, tamarmik isertitaqarnatik. Unamminerup immikkoortuisa aappaanni kalaallit isertitsipput, William Gantzhorn isertitsisoralugu. Isertitsereernermi kingorna isertitseqqinnissamut periarfissaqaqattaaraluarput. Unamminerli naammassilersoq pingasunik isertitsiffigineqarput, taamaasilluni Ungarn 1-3-mik ajugaalluni.
Isinngitsoortorpassuit
Nunanut allanut unammisartut sungiusaasuata John Eldevigip Ukrainemut unamminermut sanilliullugu arsaalluarnerusut oqaatigaa.
- Unamminermi isertitsingajaqattaaginnavippugut, taamaattoq uggornartumik isinngitsoortut amerlapput. Ungarnermiut aamma unamminermi periarfissinneqarpianngillat, unammisartugummi tamarmik sukataarput, taktikkikkullu isumaqatigiissutaasut malippaat, Sermitsiaq.AG-mut oqarpoq.
Kukkuneq akisooq
Unamminermi 1-0-mik siuaqqaneranni arsarluaraluarput, unamminermilu ajugaasimasinnaagaluarlutik.
- Unamminerup naammassiartornerani siullerpaamik kukkugatta Ungarnermiut isertitsipput. Uagut suli isertitsingajaqattaaraluarpugut, målmandi kiserngorullugu periarfissaqartaraluarluta, arsarli iserumanngivippoq. Unamminerup naammassilernerani Ungarn frisparkimik tunineqarput, frisparkiunngikkaluamik. Tassani tunioraatipallapput isertitsillutillu. Isertitseqqinniarluta saassussigaluarpugut, sukkasuumilli saassusseriataarneranni pisarivaatigut, isertitseqqillutillu, oqaluttuarpoq.
Portugalimiup sungiusaasup nersualaarpai
Portugalimi timersoqatigiiffimmit angisuumit Braga-meersumit sungiusaasoq unammineq isiginnaareerlugu kalaallit unamminerat ima oqaasertalersimavaa: Amazing (kalaallisut: tupinnaq).
- Unnukkut oqaloqatigalugit oqarput misilittakkanik unammisartugut amigaateqarnertik pissutaallutik ajugaanngitsoortut. Unammisartulli siunissagissaarluartut oqaatigaat, John Eldevig oqarpoq.
Ungarnimut ajorsareernermi kingorna unammersuaarnermi semifinalimut anngussinnaajunnaarput. Puljekkaarnermi kingullermi kalaallit japanimiunut unammissapput, taakku pingasunngornermi Ukrainermiunut 4-4-mik naligiipput.
Tallimanngornermi unammisoqassanngilaq, akunnerullu naanerani inissinniunnerit ingerlanneqassallutik.
